২০০৩ চনত স্বাক্ষৰিত বড়ো চুক্তি আৰু ২০২০ চনত সম্পাদিত বড়ো শান্তি চুক্তিৰ কিছু অংশ এতিয়াও ৰূপায়ণ কৰিবলৈ বাকী আছে বুলি বি টি চি মুৰববী হাগ্ৰামী মহিলাৰীয়ে প্ৰকাশ কৰিছে। বাগৰুম্বা দহৌত অংশগ্ৰহণ কৰি শ্ৰীমহিলাৰীয়ে কালি এইদৰে মন্তব্য কৰে। ২০০৩ চনত অটল বিহাৰী বাজপেয়ীৰ দিনত বড়ো চুক্তি আৰু প্রধানমন্ত্ৰী নৰেন্দ্ৰ মোদীৰ নেতৃত্বত ২০২০ চনত বড়ো শান্তি চুক্তি সম্পাদিত হোৱা বুলি বিটিচিৰ মুৰববীগৰাকীয়ে কয়, যে বড়ো লোকসকলে বিজেপি চৰকাৰে দেখুওৱা মৰম কেতিয়াও পাহৰিব নোৱাৰে। বিজেপি চৰকাৰে লোৱা পদক্ষেপৰ বাবেই বড়োলেণ্ডত শান্তি বৰ্তি আছে বুলি তেওঁ উল্লেখ কৰে। তেওঁ লগতে চুক্তি দুখনৰ বাকী অংশ ৰূপায়ন কৰিবলৈ অনুৰোধ জনায়। শ্ৰীমহিলাৰীয়ে বাগৰুম্বা নৃত্য প্ৰদৰ্শনৰ সুযোগ দিয়াৰ বাবে আৰু বড়োসকলৰ কলা সংস্কৃতিক বিশ্ব দৰবাৰলৈ লৈ যোৱাৰ বাবে ৰাজ্য চৰকাৰ আৰু প্ৰধানমন্ত্ৰী নৰেন্দ্ৰ মোদীৰ প্ৰচেষ্টাৰো শলাগ লয়।