চৰ্দাৰ বল্লভ ভাই পেটেলৰ ১৫০ সংখ্যক জয়ন্তীৰ লগত সংগতি ৰাখি সমগ্ৰ দেশতে আয়োজন কৰা একতাৰ পদযাত্ৰাৰ ৰাষ্ট্ৰীয় পৰ্যায়ৰ কাৰ্যসূচী আজি আৰম্ভ হ’ব। চৰ্দাৰ বল্লভ ভাই পেটেলৰ জন্মস্থান গুজৰাটৰ কৰ্মচাদৰ পৰা আৰম্ভ হ’বলগীয়া পদযাত্ৰাত কমেও ১৯০ কিলোমিটাৰ সামৰি লোৱা হ’ব। এই পদযাত্রা ৬ ডিচেম্বৰত সামৰণি পৰিব ৷ এই কাৰ্যসূচীয়ে দেশক একত্ৰিত কৰাৰ ক্ষেত্ৰত বিশেষ ভূমিকা গ্ৰহণ কৰিব বুলি আশা কৰা হৈছে। প্ৰধানমন্ত্ৰী নৰেন্দ্ৰ মোদীয়ে আনন্দৰ বল্লভ বিদ্যা নগৰত আয়োজিত উদ্বোধনী অনুষ্ঠানত ভার্চুৱেলী অংশগ্রহণ কৰিব। গুজৰাটৰ মুখ্যমন্ত্ৰী ভূপেন্দ্র পেটেল, কেন্দ্রীয় মন্ত্রী মনসুখ মান্দাভিয়া আৰু নিমুবেন বম্ভানিয়াও এই অনুষ্ঠানত উপস্থিত থাকিব। কেন্দ্ৰীয় মন্ত্রী, মুখ্যমন্ত্ৰী, ৰাজ্যিক মন্ত্ৰী, ৰাজ্যপাল, সাংসদ আদিয়ে প্ৰতিদিনে এই পদযাত্ৰাৰ নেতৃত্ব দিব। এই পদযাত্ৰাৰ সমান্তৰালকৈ জিলাসমূহত উন্নয়নমূলক কাৰ্যসূচীৰ আয়োজন কৰা হ’ব। এই কাৰ্যসূচীসমূহৰ লক্ষ্য হৈছে- নাগৰিকসকলক সংগঠিত কৰা, স্থানীয় উদ্ভাৱনক উদযাপন কৰা আৰু যুৱশক্তিক একত্ৰিত কৰা।