● বৈদেশিক পৰিক্ৰমা দপ্তৰৰ মন্ত্ৰী ড০ এছ জয়শংকৰে সকলো ধৰণৰ সন্ত্ৰাসবাদী কার্যকলাপ উৎখাত কৰাৰ হকে ভাৰত আৰু আফগানিস্তানে ঐক্যবদ্ধভাৱে কাম কৰাৰ বিষয়ত গুৰুত্ব আৰোপ কৰিছে। নতুন দিল্লীত আজি আফগানিস্তানৰ বিদেশ মন্ত্ৰী আমিৰ খান মুট্টাকীৰ সৈতে অনুষ্ঠিত বৈঠকৰ আৰম্ভণিৰ ভাষণত ড০ জয়শংকৰে, বিকাশ আৰু সমৃদ্ধিৰ দিশত কৰ্মক্ষেত্ৰত আগবাঢ়ি যোৱাৰ বাবে দুয়োখন দেশৰ উমৈহতীয়া প্রতিশ্রুতিবদ্ধতাৰ বিষয়ে দোহাৰে। আফগানিস্তানৰ উন্নয়ন আৰু বিকাশৰ ক্ষেত্ৰত ভাৰতে গভীৰভাৱে আগ্রহী বুলি তেওঁ মত প্ৰকাশ কৰে। দুয়োখন দেশৰ মাজৰ পাৰস্পৰিক সহযোগিতাৰ বিষয়ৰ ওপৰত গুৰুত্ব আৰোপ কৰি ড০ জয়শংকৰে কাবুলস্থিত ভাৰতীয় কাৰিকৰী মিছনক দুতাবাসৰ পৰ্যায়লৈ উন্নীত কৰাৰ বিষয়েও ঘোষণা কৰে।
অনুষ্ঠানত ভাষণ দি আফগানিস্তানৰ বিদেশ মন্ত্ৰী আমিৰ খান মুট্টাকীয়ে কয় যে আফগানিস্তানে সেই দেশৰ ভূমিভাগৰ পৰা আন কোনো দেশৰ বিৰুদ্ধে সন্ত্রাসবাদী কার্যকলাপ সংঘটিত কৰিবলৈ নিদিয়ে। দেশখনে কাহানিও ভাৰতৰ বিৰুদ্ধে কোনো ধৰণৰ মন্তব্য প্ৰকাশ কৰা নাই বুলি উল্লেখ কৰি তেওঁ কয় যে আফগানিস্তানে ভাৰতৰ সৈতে সুসম্পৰ্কৰ প্ৰতি সদায়েই গুৰুত্ব আৰোপ কৰি আহিছে।
