শিলচৰৰ নেচনেল ইনষ্টিটিউট অব টেকন’লজিৰ চৌহদত হিংসাত্মক ঘটনা সন্দৰ্ভত ৫ গৰাকী বাংলাদেশী ছাত্ৰক সাময়িকভাৱে বহিষ্কাৰ কৰা হৈছে। এই ছাত্ৰ কেইজনক এটা শিক্ষাবৰ্ষৰ বাবে বহিষ্কাৰ কৰাৰ লগতে ছাত্রাবাসত থকাৰ ক্ষেত্ৰতো নিষেধাজ্ঞা আৰোপ কৰা হৈছে। তৃতীয় বৰ্ষৰ এই ছাত্রকেইজনে সহপাঠীক আক্ৰমণ কৰাৰ অভিযোগ উঠিছিল। এই ছাত্রকেইজন এছ কে ছাহৰিয়াৰ আহমেদ আকাশ, সীমান্ত ঘোষ, সৌম্যজিৎ পাল, ছাজ্জাদ হুছেইন ৰফী আৰু মহম্মদ নুৰ হুছেইন বুলি প্ৰকাশ কৰা হৈছে। কেন্দ্ৰীয় চৰকাৰৰ সাংস্কৃতিক সম্পৰ্ক পৰিষদৰ জলপানী লাভ কৰি এই ছাত্রকেইজনে প্রতিষ্ঠানটোত অধ্যয়ন কৰি আছিল। যোৱা ৮ ছেপ্তেম্বৰত সংঘটিত এই ঘটনাৰ পাছত শিলচৰ চিকিৎসা মহাবিদ্যালয় হাস্পতালত কেইবাজনো ছাত্রক সংকটজনক অৱস্থাত ভৰ্তি কৰোৱা হৈছিল। প্ৰতিষ্ঠানটোৰ পৰিচালক দিলীপ কুমাৰ বৈদ্যই কয়, যে তেওঁলোকৰ হাতত ছাত্রকেইজনৰ বিৰুদ্ধে পর্যাপ্ত তথ্য, প্রমাণ আছে। তেওঁলোকক বাংলাদেশলৈ ঘূৰাই পঠিওৱা হ’ব বুলি তেওঁ প্ৰকাশ কৰে।