শিক্ষা মন্ত্রী ডাঃ ৰণোজ পেগুৱে আজি তিনিচুকীয়া জিলা আয়ুক্ত কাৰ্যালয়ত এখন বৈঠকত জিলাখনৰ শৈক্ষিক দিশৰ পৰ্যালোচনা কৰে। জিলাখনৰ সামগ্রিক শৈক্ষিক ফলাফল পূৰ্বতকৈ ভালেখিনি উন্নত হোৱা আৰু মুঠ নামভৰ্তিৰ সংখ্যা বৃদ্ধিৰ লগতে আধাতে বিদ্যালয় এৰা শিক্ষাৰ্থীৰ সংখ্যা হ্ৰাস পোৱাক লৈ ডাঃ পেগুৱে সন্তুষ্টি প্ৰকাশ কৰে। অৱশ্যে এই ক্ষেত্ৰত ৰাজ্যৰ গড় পৰিসংখ্যাতকৈ জিলাখন কিছু পিচ পৰি থকাৰ পৰিপ্ৰেক্ষিতত তেওঁ সকলো বিষয়াবৰ্গক নতুন শিক্ষা নীতি অনুসৰি শৈক্ষিক পৰিস্থিতিতন্ত্ৰ উন্নত কৰিবলৈ আহ্বান জনায়। ডাঃ পেগুৱে আজি তিনিচুকীয়াত সদৌ অসম ট্যুৰিষ্ট গাইড সংস্থাৰ দ্বিতীয়খন সন্মিলনত অংশ লয়। উত্তৰ পূৰ্বাঞ্চলৰ পৰ্যটন খণ্ডৰ দ্ৰুত বিকাশ হৈছে বুলি উল্লেখ কৰি মন্ত্ৰীগৰাকীয়ে সংস্থাটোৰ এনে পদক্ষেপৰ বাবে শলাগ লয়। এই সন্মিলনত অৰুণাচল প্ৰদেশৰ বিধায়ক অ’কেন টায়েং উপস্থিত থাকে।