শক্তি, গৃহ নিৰ্মাণ আৰু নগৰ পৰিক্ৰমা মন্ত্ৰী মনোহৰ লালে আজি কেৰালাত ৰূপায়িত হৈ থকা শক্তি আৰু নগৰ পৰিক্ৰমা বিভাগৰ বিভিন্ন প্ৰকল্পৰ পৰ্যালোচনামূলক এখন বৈঠকত অধ্যক্ষতা কৰে। থিৰুৱানন্তপুৰমত অনুষ্ঠিত এই বৈঠকখনত পেট্ৰ’লিয়াম আৰু প্ৰাকৃতিক গেছ দপ্তৰৰ ৰাজ্য মন্ত্ৰী সুৰেশ গোপী, বিদ্যুৎ বিভাগৰ ৰাজ্য মন্ত্ৰী কে কৃষ্ণ কুট্টীকে ধৰি কেইবাগৰাকীও জ্যেষ্ঠ বিষয়ববীয়া উপস্থিত থাকে। শ্রী মনোহৰ লালে সামাজিক মাধ্যম এক্সৰ জৰিয়তে সদৰি কৰা অনুসৰি পৰ্যালোচনামূলক বৈঠকখনত জলবিদ্যুৎ প্ৰকল্পৰ উন্নয়ন, শক্তি সঞ্চয়, কাৰ্যকৰিতাৰ ক্ষেত্ৰৰ অন্তৰায়, ৰাষ্ট্ৰীয় তাপবিদ্যুৎ শক্তি নিগমৰ-শক্তি ক্রয় চুক্তিসমূহ শক্তিশালী কৰা, উচ্চ ক্ষমতা সম্পন্ন প্ৰত্যক্ষ বিদ্যুৎ যোগান ব্যৱস্থাসমূহ সক্ৰিয় কৰাকে ধৰি শক্তি সন্দৰ্ভত বিভিন্ন আলোচনা কৰা হয়। প্রধানমন্ত্রী আবাস যোজনা নগৰীয়া দ্বিতীয় পৰ্যায়ৰ অভিযান, অদ্ভুত যোজনা, স্বচ্ছ ভাৰত অভিযানৰ দ্বিতীয় সংস্কৰণ, বৈদ্যুতিক বাহনৰ উন্নয়নকে ধৰি কেন্দ্ৰীয় চৰকাৰৰ বিভিন্ন ধবজাবাহী আঁচনিৰ প্ৰগতি সন্দৰ্ভত আলোচনা কৰা হয়। পাছত শ্ৰী মনোহৰ লালে মুখ্যমন্ত্ৰী পিনাৰায়ী ৱিজয়নকো সাক্ষাৎ কৰে। মন্ত্ৰীগৰাকীয়ে কাইলৈ কোচি ভ্ৰমণ কৰাৰ লগতে জলপৰিবহণ সেৱাসমূহৰ কাৰ্যকৰিতা পর্যালোচনা কৰিব।