উচ্চতম ন্যায়ালয়ে আজি দিল্লী সুৰা নীতিৰ অভিযোগত কেন্দ্ৰীয় তদন্তকাৰী ব্যুৰো, চিবিআইয়ে পঞ্জীয়ন কৰা গোচৰত দিল্লীৰ মুখ্যমন্ত্ৰী অৰবিন্দ কেজৰিৱালৰ গ্ৰেপ্তাৰক প্ৰত্যাহ্বান জনাই বিচৰা জামিন আবেদনৰ শুনানি স্থগিত ৰাখে৷ চি. বি. আইয়ে গোচৰটোত প্ৰত্যুত্তৰ দাখিল কৰিবলৈ সময় বিচৰাৰ পিছতে এই শুনানি ৫ চেপ্টেম্বৰলৈ স্থগিত ৰখা হৈছে। ন্যায়াধীশ সূর্যকান্ত আৰু উজ্জ্বল ভূঞাৰ বিচাৰপীঠে এই শুনানি গ্ৰহণ কৰে। ইয়াৰ পূৰ্বে দিল্লীৰ আদালতে অভিযুক্ত শ্রী কেজৰিৱালৰ ন্যায়িক জিম্মাৰ সময়সীমা ২৭ আগষ্টলৈকে বৃদ্ধি কৰিছিল৷ উল্লেখযোগ্য যে চিবিআইয়ে আম আদমী পাৰ্টিৰ মুৰব্বীগৰাকীক ২০২৪ চনৰ ২৬ জুনত আনুষ্ঠানিকভাৱে গ্ৰেপ্তাৰ কৰিছিল।