উত্তৰ-পূব সীমান্ত ৰে’লৱেৰ জাতিংগা আৰু লামপুৰৰ মাজৰ ভূমিস্খলন হোৱা ৰে’লপথৰ পৰা শিল-বালিৰ আৱৰ্জনা আঁতৰোৱাৰ কাম যুদ্ধকালীন ক্ষিপ্ৰতাৰে চলি আছে। বর্তমান ১৫খন এছকেভেটৰ আৰু ২০০ৰো অধিক শ্ৰমিকে ৰে’লপথছোৱা ৰে’ল চলাচলৰ উপযোগী কৰি তোলাৰ বাবে দিনে-নিশাই কাম কৰি আছে। উত্তৰ-পূব সীমান্ত ৰে’লৱেৰ মহাপ্ৰৱন্ধক চেতন কুমাৰ শ্ৰীবাস্তৱে আজি ভূমিস্খলন হোৱা অঞ্চলটো পৰিদৰ্শন কৰি মেৰামতি কাৰ্যৰ বুজ লয়। তেওঁ কয়, যে বতৰ অনুকুল হ’লে অহা সোমবাৰৰ ভিতৰত এই পথেৰে আংশিকভাৱে ৰে’ল চলাচল পুনৰ আৰম্ভ কৰিব পৰা যাব। মেৰামতি হোৱাৰ পাছত ভূমিস্খলন হোৱা অঞ্চলৰ ১০০ মিটাৰ অংশত সাৱধানতাৰে লেহেমীয়া গতিত ৰে’ল চলাচল কৰা হ’ব আৰু ভূমিস্খলন প্ৰতিৰোধৰ বাবে থকা গার্ডৱালৰ পুনৰ নিৰ্মাণৰ বাবে আৰু প্ৰায় এমাহ সময় লাগিব। পূৰ্বৰ মিটাৰগজ ৰে’লপথৰ ওপৰতে ব্ৰগগজ ৰে’লপথ স্থাপন কৰাৰ ফলত এই ৰে’লপথছোৱাৰ কিছু কাৰিকৰী আঁসোৱাহ ৰৈ গৈছে। তেওঁ কয়, যে যে লংকাৰ পৰা শিলচৰ সংলগ্ন মইনাৰবন্দলৈ প্ৰায় ১৬০ কিলোমিটাৰ দৈৰ্ঘ্যৰ নতুন দ্বৈত ৰে’লপথ নিৰ্মাণৰ বাবে জৰীপ চলাই থকা হৈছে।