ভাৰত আৰু ইংলেণ্ডৰ মাজত অ’ল্ড ট্ৰেফ’ৰ্ডত অনুষ্ঠিত চতুৰ্থখন টেষ্ট মেচ ড্র’ হয়। চতুৰ্থখন টেষ্টৰ প্ৰথম ইনিংছত ভাৰতে ৩৫৮ ৰাণ সংগ্ৰহ কৰে। ইয়াৰ পাছতে ইংলেণ্ডে প্রথম ইনিংছত ৬৬৯ ৰাণ সংগ্ৰহ কৰি ৩১১ ৰাণৰ অগ্ৰগতি লাভ কৰে। দ্বিতীয় ইনিংছত টীম ইণ্ডিয়াই চাৰিটা উইকেটৰ বিনিময়ত ৪২৫ ৰাণ কৰে। খেলখনত ৱাশ্বিংটন সুন্দৰ আৰু ৰবীন্দ্ৰ জাদেজাই উৎকৃষ্ট খেল প্ৰদৰ্শন কৰে আৰু দুয়োজনে শতকীয় ইনিংছ খেলে। ৱাশ্বিংটন সুন্দৰে ২০৬টা বলত অপৰাজেয় ১০১ ৰাণ সংগ্ৰহ কৰি খেলি আছিল আৰু জাদেজাই ১৮৫টা বলত ১০৭ ৰাণ কৰি খেলি আছিল। ইয়াৰ পূৰ্বে মেচখনত শুভমন গিলেও শতক অর্জন কৰে। ইংলেণ্ডৰ হৈ পাঁচটা উইকেট দখল আৰু ১৪১ৰাণ সংগ্ৰহ কৰা বেন ষ্টকক প্লেয়াৰ অৱ দা মেচ সন্মান প্ৰদান কৰা হয়। ভাৰত শৃংখলাত ২-১ ফলাফলত পিছ পৰি আছে। শৃংখলাৰ পঞ্চম আৰু অন্তিমখন মেচ ৩১ জুলাইৰ পৰা আৰম্ভ হ’ব।