ভাৰতে বিশ্ব স্বাস্থ্য সংস্থাৰ দ্বাৰা জনস্বাস্থ্য সমস্যা হিচাপে স্বীকৃত চকুৰ এবিধ সংক্ৰামক ৰোগ ট্রাক’মা নিৰ্মূলকৰণ প্ৰমাণপত্ৰ লাভ কৰিছে। জেনেভাত অনুষ্ঠিত ৭৮ সংখ্যক বিশ্ব স্বাস্থ্য মহাসভাত এই প্ৰমাণপত্ৰ প্ৰদান কৰা হয় । ৰোগ নিৰ্মূলকৰণ আৰু প্ৰতিৰোধমূলক স্বাস্থ্যসেৱাৰ ক্ষেত্ৰত বহনক্ষম প্ৰচেষ্টা আৰু সকলোৰে বাবে সু-স্বাস্থ্য নিশ্চিত কৰাৰ দিশত ভাৰতৰ প্ৰতিশ্ৰুতিবদ্ধতাৰ চিনস্বৰূপে এই সন্মান আগবঢ়োৱা হৈছে। উল্লেখযোগ্য যে বিগত বৰ্ষৰ ৮ অক্টোবৰত বিশ্ব স্বাস্থ্য সংস্থাই ভাৰত চৰকাৰে ট্ৰাক’মা ৰোগ নিৰ্মূল কৰাৰ কথা ঘোষণা কৰিছিল। এই জনস্বাস্থ্য মাইলৰ খুঁটি অতিক্ৰম কৰা ভাৰত হৈছে দক্ষিণ-পূব এছিয়াৰ তৃতীয়খন দেশ। ভাৰত চৰকাৰে ৰাষ্ট্ৰীয় দৃষ্টিহীনতা আৰু দৃষ্টি বাধাগ্ৰস্ততা নিয়ন্ত্ৰণ কাৰ্যসূচীৰ অধীনত এই ৰোগ নিৰ্মূলকৰণৰ বাবে বিভিন্ন পদক্ষেপ গ্ৰহণ কৰিছে।