ভাৰতীয় বতৰ বিজ্ঞান বিভাগে অসমকে ধৰি মেঘালয়, নাগালেণ্ড, মণিপুৰ, মিজোৰাম আৰু ত্ৰিপুৰাত নিশা আৰু পুৱাৰ ভাগত ঘন কুঁৱলী পৰাৰ আগজাননী দিছে। একেদৰে পাঞ্জাৱ, হাৰিয়ানা আৰু ৰাজস্থানতো ২ৰ পৰা ৩ দিনৰ ভিতৰত অতি ঘন কুঁৱলী পৰিব পাৰে বুলি বতৰ বিজ্ঞান বিভাগে প্রকাশ কৰিছে। বিভাগে দিয়া আগলি বতৰা অনুসৰি অহা পাঁচ দিনত উত্তৰ প্ৰদেশৰ তাপমাত্ৰা বৰ্তমানতকৈ ৪ৰ পৰা ৬ ডিগ্রী চেলছিয়াছ হ্রাস হ’ব। আনহাতে পঞ্জাৱ, হাৰিয়ানা, চণ্ডীগড়, দিল্লী আৰু ৰাজস্থানৰ তাপমাত্রা ৩ৰ পৰা ৪ ডিগ্ৰী চেলছিয়াছ হ্ৰাস হোৱাৰ সম্ভাৱনা আছে। একেদৰে বিভাগে অহা ১ জানুৱাৰীৰ পৰা ৪ জানুৱাৰিলৈ পশ্চিম হিমালয় অঞ্চলসমূহত বৰষুণ আৰু তুষাৰপাত হোৱাৰ সম্ভাৱনা আছে বুলি জানিবলৈ দিছে।