বাক্সা জিলাৰ নিকাছি কাৰাগাৰত সংঘটিত হিংসাত্মক ঘটনাৰে জড়িত আৰু দুজন লোকক গ্ৰেপ্তাৰ কৰা হৈছে। বাক্সা জিলাৰ আৰক্ষী অধীক্ষক উজ্জ্বল প্রতীম বৰুৱাই জনোৱা মতে হিংসাত্মক ঘটনাৰে জড়িত মুঠ ১১ জন লোকক এতিয়ালৈকে গ্ৰেপ্তাৰ কৰা হৈছে। উল্লেখযোগ্য যে, যোৱা ১৫ অক্টোবৰত জুবিন গাৰ্গৰ মুত্যুৰ সৈতে জড়িত মূল অভিযুক্ত শ্যামকানু মহন্ত আৰু সিদ্ধার্থ শৰ্মাক বাক্সা কাৰাগাৰলৈ প্ৰেৰণ কৰা হৈছিল। দুই অভিযুক্তক কঢ়িয়াই নিয়া বাহনলৈ লক্ষ্য কৰি একাংশ লোকে শিলগুটি নিক্ষেপ কৰিছিল। ইয়াৰ পিছতেই পৰিস্থিতি অধিক অবনতি ঘটে। আৰক্ষী অধীক্ষকগৰাকীয়ে জনোৱা মতে, সম্প্রতি বাক্সা জিলাৰ পৰিৱেশ স্বাভাৱিক হৈছে যদিও জিলাখনত বি এন এছ এছৰ ১৬৩ ধাৰা অব্যাহত আছে। হিংসাত্মক ঘটনাবে জড়িত প্রত্যেকজন লোকক চিনাক্ত কৰা হৈছে বুলি উল্লেখ কৰি আৰক্ষী বিষয়াগৰাকীয়ে কয়, যে চিনাক্ত কৰা প্ৰতিজন লোকক শীঘ্রেই গ্ৰেপ্তাৰ কৰা হ’ব।