প্রবীণ সাংবাদিক ধীৰেন্দ্ৰ নাথ বেজবৰুৱা, বিশিষ্ট চলচ্চিত্ৰ পৰিচালক জাহ্নু বৰুৱা, উদ্যোগী ড° নৰেন্দ্ৰ নাথ দত্ত আৰু এল ডি ছ’য়ানলৈ ক্ৰীড়া ক্ষেত্ৰলৈ আগবঢ়োৱা অৱদানৰ বাবে এইবাৰ ৰাধা গোবিন্দ বৰুৱা সোঁৱৰণী বঁটা প্ৰদান কৰা হয়। ৰাজ্যপাল লক্ষ্মণ প্রসাদ আচার্যই কালি অনুষ্ঠিত এটা গাম্ভীৰ্যপূৰ্ণ অনুষ্ঠানত ব্যক্তিকেইজনক এই বঁটা প্ৰদান কৰে। অনুষ্ঠানত কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱাল আৰু দি আছাম ট্ৰিবিউন গ্ৰুপৰ পৰিচালন সঞ্চালক ববিতা ৰাজখোৱা উপস্থিত থাকে। অনুষ্ঠানত ভাষণ দি ৰাজ্যপালে বঁটা লাভ কৰা আটাইকেইগৰাকী ব্যক্তিকে নিজ নিজ ক্ষেত্ৰত আগবঢ়োৱা অৱদানৰ বাবে ভূয়সী প্রশংসা কৰে। ভাষণ প্ৰসংগত তেওঁ কয়, যে বঁটা লাভ কৰা আটাইকেইগৰাকীয়ে নতুন প্ৰজন্মৰ বাবে সাহস আৰু অনুপ্ৰেৰণাৰ উৎস হৈ ৰ’ব। সমাজৰ হকে কৰা তেওঁলোকৰ কৰ্মৰাজিত অসমৰ বিভিন্ন ক্ষেত্ৰৰ উজ্জীৱিত দিশসমূহ প্ৰতিফলিত হয়। ৰাজ্যপাল শ্ৰী আচাৰ্যই লগতে আছাম ট্ৰিবিউন গ্রুপক সাংবাদিকতাৰ ক্ষেত্ৰত ৮ টা দশকজুৰি আগবঢ়াই অহা সবল সেৱাৰ বাবে ধন্যবাদ জ্ঞাপন কৰে ৷