ৰায়পুৰত অনুষ্ঠিত আৰক্ষী সঞ্চালক প্ৰধান আৰু আৰক্ষী মহাপৰিদৰ্শক সন্মিলনৰ আজি সামৰণি পৰিব। প্রধানমন্ত্ৰী নৰেন্দ্ৰ মোদীয়ে এই সন্মিলনৰ অধ্যক্ষতা কৰিছে। শ্ৰী মোদীয়ে সামাজিক মাধ্যম এক্স যোগে সন্মিলনৰ প্ৰথম দিনা দেশৰ সুৰক্ষা ব্যৱস্থাৰ বিভিন্ন দিশ সম্পর্কে বিশদভাৱে আলোচনা হোৱা বুলি প্ৰকাশ কৰিছে। এই সন্মিলন ৰাষ্ট্ৰীয় সুৰক্ষাৰ উত্তম পন্থা আৰু উদ্ভাৱন ভগাই লোৱাৰ গুৰুত্বপূৰ্ণ মঞ্চ বুলি তেওঁ মন্তব্য কৰে। প্ৰধানমন্ত্ৰীয়ে আজি বিশিষ্ট সেৱাৰ বাবে আগবঢ়োৱা ৰাষ্ট্ৰপতিৰ আৰক্ষী পদকসমূহ প্ৰদান কৰিব। কেন্দ্ৰীয় গৃহমন্ত্ৰী অমিত শ্বাহ, ৰাষ্ট্ৰীয় সুৰক্ষা উপদেষ্টা অজিত দোভাল, কেন্দ্ৰীয় গৃহ ৰাজ্য মন্ত্ৰী, বিভিন্ন ৰাজ্য আৰু কেন্দ্ৰীয় শাসিত অঞ্চলৰ আৰক্ষী সঞ্চালক প্ৰধান আৰু কেন্দ্ৰীয় আৰক্ষী সংস্থাসমূহৰ মুৰববীসকলে এই সন্মিলনত ভাগ লৈছিল। সন্মিলনত নতুন যুগৰ প্ৰত্যাহ্বানৰ বিৰুদ্ধে নাগৰিকসকলক সুৰক্ষা প্ৰদানৰ পৰৱৰ্তী প্ৰজন্মৰ পৰিকাঠামো বিকশাই তোলাত বিশেষ গুৰুত্ব আৰোপ কৰা হৈছে। আলোচনাত বাওপন্থী উগ্রবাদ, সন্ত্রাসবাদ প্রতিহতকৰণ, দুর্যোগ ব্যৱস্থাপনা, মহিলাৰ সুৰক্ষা আৰু শান্তি-শৃংখলা ৰক্ষাৰ কামত ফৰেনচিক বিজ্ঞান তথা কৃত্রিম বুদ্ধিমত্তাৰ প্ৰয়োগকে ধৰি ৰাষ্ট্ৰীয় সুৰক্ষাৰ সৈতে জড়িত ঘাই ঘাই বিষয়সমূহে স্থান লাভ কৰিছে।