প্রধানমন্ত্ৰী নৰেন্দ্ৰ মোদীয়ে আজি ১৮,৫৩০ কোটি টকা ব্যয়সাপেক্ষে অসমৰ প্ৰধান আন্তঃগাঁথনি আৰু ঔদ্যোগীক বিকাশৰ সৈতে জড়িত বহুকেইটা প্ৰকল্পৰ উদ্বোধন আৰু আধাৰশিলা স্থাপন কৰে। প্ৰথমে তেওঁ অঞ্চলটোৰ চিকিৎসা-শিক্ষা আৰু স্বাস্থ্যৰ যতন শক্তিশালী কৰাৰ উদ্দেশ্যে মঙলদৈত প্রায় ৫৭৬ কোটি টকা ব্যয়েৰে নিৰ্মাণ কৰিবলগীয়া দৰং চিকিৎসা মহাবিদ্যালয়, এখন জি. এন. এম. স্কুল আৰু এখন নাৰ্ছিং মহাবিদ্যালয়ৰ আধাৰশিলা স্থাপন কৰে। তেওঁ লগতে ৰাজধানী চহৰখনৰ কাষৰীয়া অঞ্চলৰ যোগাযোগ ব্যৱস্থা সুগম কৰি তোলাৰ উদ্দেশ্যে ভার্চুৱেল পদ্ধতিৰে প্ৰায় ৭ হেজাৰ কোটি টকা ব্যয়েৰে ব্ৰহ্মপুত্ৰৰ ওপৰত নিৰ্মাণ কৰিবলগীয়া নাৰেঙ্গী-কুৰুৱা সংযোগী দলং আৰু গুৱাহাটী ৰিং ৰোড প্ৰকল্পৰো আধাৰশিলা স্থাপন কৰে।
ইয়াৰ পাছত প্ৰধানমন্ত্ৰীগৰাকী গোলাঘাট জিলাৰ নুমলীগড় লৈ যাব আৰু নুমলীগড় শোধনাগাৰত বিশ্বৰ প্ৰথমটো বাঁহভিত্তিক জৈৱ ইথানল প্রকল্প উদ্বোধন কৰিব। প্ৰধানমন্ত্ৰীয়ে শোধনাগাৰটোৰ নতুন পলিপ্রপিলিন গোটটোৰো আধাৰশিলা স্থাপন কৰিব। ইয়াৰ জৰিয়তে নিয়োগৰ সুবিধা বৃদ্ধি হ’ব আৰু ৰাজ্যখনত সামগ্ৰীকভাৱে আৰ্থসামাজিক বিকাশ ঘটাব বুলি আশা কৰা হৈছে।