FIH প্ৰ’ লীগ হকী প্রতিযোগিতাত কালি সন্ধিয়া নেডাৰলেণ্ডছৰ এমটেলভীনত অনুষ্ঠিত এখন খেলত ভাৰত আৰ্জেণ্টিনাৰ হাতত ১-২ গ’লৰ ব্যৱধানত পৰাস্ত হয়। ভাৰতৰ যুগৰাজ সিঙে খেলৰ চতুৰ্থ মিনিটতে গ’ল দি দলৰ অগ্ৰগতি প্ৰদান কৰে যদিও কিছুসময়ৰ পাছত টমাছ ডমেনেই দিয়া গ’লেৰে আৰ্জেণ্টিনাই সমতা স্থাপন কৰে। প্ৰথমাৰ্থত দুয়োটা দলেই গল দিয়াৰ কেইবাটাও সুযোগ লাভ কৰিছিল যদিও উভয় দলৰ গল ৰক্ষক কৃষণ বাহাদুৰ পাঠক আৰু টমাছ ছেণ্টিয়াগোৰ সুন্দৰ প্ৰদৰ্শনৰ বলত বিৰতিৰ পৰলৈকে স্ক’ৰ ১-১ গলত অপৰিৱৰ্তিত হৈ থাকে । খেলৰ ৪৯ মিনিটত ডমেনে পুনৰ গল দি আৰ্জেণ্টিনাক অগ্ৰগতি প্ৰদান কৰে। ভাৰতে খেলৰ অন্তিম মূহূৰ্তত পেনাল্টি লাভ কৰে যদিও এই সুযোগ গললৈ ৰূপান্তৰ কৰাত ব্যৰ্থ হয়। ভাৰতীয় দলৰ অধিনায়ক হৰমন প্ৰীট সিঙে আঙুলিত পোৱা আঘাতৰ বাবে খেলখনত অংশগ্ৰহণ কৰিব নোৱাৰাত হার্দিক সিঙে দলৰ নেতৃত্ব বহন কৰে। ভাৰতে বৰ্তমানলৈ ১২ খন খেলৰ পৰা ১৫ পইণ্ট লাভ কৰি পইণ্ট তালিকত পঞ্চম স্থানত আছে। ভাৰত পৰৱৰ্তী খেলত কাইলৈ অষ্ট্ৰেলিয়াৰ বিৰুদ্ধে অৱতীৰ্ণ হ’ব।