নাগালেণ্ডৰ নেচনেল ডেমক্রেটিক প্রগ্রেছিভ পার্টী চমুকৈ এন ডি পি পি নামৰ ৰাজনৈতিক দলটোৱে নাগা পিপলছ ফ্রন্ট, এন পি এফৰ সৈতে একত্ৰিত হৈ এটা সুকীয়া আঞ্চলিক দল গঠনৰ সিদ্ধান্ত গ্রহণ কৰিছে। এই একত্ৰিকৰণৰ পাছত ৰাজ্যখনৰ মুখ্যমন্ত্ৰী নেইফিউ ৰিঅ’ নাগা পিপলছ ফ্র’ণ্টৰ বিধায়িনী দলৰ নেতা হিচাপে নির্বাচিত হৈছে। শেহতীয়া এই ব্যৱস্থাৰ ফলত ৬০ জনীয়া নাগালেণ্ড বিধানসভাত এন পি এফৰ বিধায়কৰ সংখ্যা ৩৪ লৈ বৃদ্ধি পালে।
কোহিমাত কালি অনুষ্ঠিত এন ডি পি পিৰ ষষ্ঠ সাধাৰণ সভাত দলটোৰ একত্ৰিকৰণ সিদ্ধান্ত গ্রহণ কৰা হয়। এন ডি পি পিৰ দলীয় সদস্যসকলৰ লগতে ৰাজ্যখনৰ ভিন ভিন স্থানৰ পৰা আহি সমবেত হোৱা প্রতিনিধিসকলে কালিৰ এই অধিৱেশনত অংশগ্ৰহণ কৰে। নাগালেণ্ড চৰকাৰৰ মন্ত্ৰী কে জি কেন্যেই একত্ৰিকৰণৰ এই সিদ্ধান্ত উত্থাপন কৰি কয়, যে এই পদক্ষেপে নাগা জনসাধাৰণৰ আঞ্চলিক ৰাজনৈতিক পৰিচয়ক অধিক শক্তিশালী কৰিব।
