নগাঁও জিলাৰ কামপুৰ ৰাজহ চক্ৰৰ অন্তৰ্গত লুটুমাৰী সংৰক্ষিত বনাঞ্চলৰ দখলিকৃত মাটিত উচ্ছেদ অভিযান অব্যাহত আছে। কালি লুটুমাৰী সংৰক্ষিত বনাঞ্চলৰ চানখোলা, কান্দাপাৰা, জুৰিৰপাৰ, বেদেৰীপাৰ, আৰু মাজগাঁৱত অবৈধভাৱে বাস কৰা পৰিয়ালসমহুক উচ্ছেদ কৰাৰ পাছত জিলা প্রশাসনে আৰক্ষী আৰু বন বিভাগৰ সহযোগত আজি দখলিকৃত বাকী অংশসমূহ দখলমুক্ত কৰাৰ বাবে অভিযান চলাব। নগাঁও জিলাৰ আয়ুক্ত দেৱাশীষ শৰ্মাই জনোৱা মতে গুৱাহাটী উচ্চ ন্যায়ালয়ৰ নিৰ্দেশ কঠোৰভাৱে পালন কৰি অঞ্চলটোত উচ্ছেদ চলোৱা হৈছে। বছৰ বছৰ ধৰি দখল হৈ থখা বনাঞ্চলখনৰ ৫,৬৯২ বিঘা ভূমি খালী কৰাৰ ব্যৱস্থা কৰা হৈছে। দখলিকৃত ভূমিৰ ১৫৪০ বিঘা মাটি লুটুমাৰীৰ আৰু বাকীখিনি কান্দাপাৰা, চানখোলা, বেদেৰীপাৰ, জুৰিৰপাৰ, কদমণি, মাজগাঁও, নিমবাগানলৈ বিস্তৃত হৈ আছে। প্রশাসনে দখলিকৃত ভূমি উচ্ছেদ কৰিবৰ বাবে ৫০ খন এক্সকেভেটৰ আৰু সহস্রাধিক নিৰাপত্তাৰক্ষীক নিয়োগ কৰিছে।