দক্ষিণ কোৰিয়াৰ লেখিকা হান কাঙলৈ ২০২৪ বৰ্ষৰ সাহিত্যৰ ন’বেল বঁটা আগবঢ়োৱা হৈছে। লেখিকাগৰাকীক কাব্যাত্মক গদ্যৰ বাবে এই সন্মানেৰে বিভূষিত কৰা হৈছে। তেওঁ লিখা কেইখনমান প্ৰসিদ্ধ গ্ৰন্থৰ ভিতৰত দি ভেজিটেৰিয়ান, দ্যা হোৱাইট বুক, হিউমেন এক্টছ আৰু গ্ৰীক লেচনছ অন্যতম। হান কাঙে ১৯৭০ চনত দক্ষিণ কোৰিয়াৰ গোৱাং জু চহৰত জন্মলাভ কৰিছিল যদিও ৯ বছৰ বয়সত তেওঁ পৰিয়ালৰ সৈতে ছিউললৈ গৈছিল। লিখা-মেলাৰ লগতে শিল্প আৰু সংগীতৰ সৈতেও তেওঁ জড়িত। ১৯৯৩ চনত কবিতা প্ৰকাশ কৰি নিজৰ সাহিত্যৰ যাত্ৰা আনুষ্ঠানিকভাৱে আৰম্ভ কৰা হান কাঙে পৰৱৰ্ত্তী সময়ত ছুটি গল্প সংকলনকে ধৰি কেইবাখনো গদ্য ৰচনাও প্ৰকাশ কৰিছে।