■ ডিট্‌ৱা নামৰ ঘূৰ্ণী বতাহৰ প্ৰভাৱত হোৱা নেৰা-নেপেৰা বৰষুণৰ বাবে শ্ৰীলংকাৰ ভালেমান অংশত ব্যাপক ধন-জন হানি হৈছে। ধুমুহাজাকৰ ফলত ১২৩ জন লোকে প্ৰাণ হেৰুৱাইছে আৰু ১৩০ জন লোক সন্ধানহীন হৈ আছে। বতাহজাকৰ ফলত ৩ লাখ ৭০ হাজাৰৰো অধিক লোক ক্ষতিগ্ৰস্ত হৈছে। শ্রীলংকাত কেইবাদিনো ধৰি হোৱা নেৰা-নেপেৰা বৰষুণ হ্ৰাস পাইছে আৰু বতাহজাক সম্প্রতি তামিলনাডুৰ উপকূলভাগৰ দিশে অগ্ৰসৰ হৈছে। ঘূৰ্ণী বতাহজাক কাৰাইকলৰ পৰা প্ৰায় ২২০ কিলোমিটাৰ দক্ষিণ-পূব আৰু পুডুচেৰীৰ পৰা ৩৮০ কিলোমিটাৰ নিলগত কেন্দ্ৰীভূত হৈ আছে আৰু প্ৰতি ঘণ্টাত ৭ কিলোমিটাৰ বেগেৰে উত্তৰ পশ্চিম দিশে অগ্ৰসৰ হৈছে। বতৰ বিজ্ঞান বিভাগৰ আগলি বতৰা অনুসৰি বতাহজাক কাইলৈ নিচেই পুৱা উত্তৰ তামিলনাডুৰ সমীপৰ বংগোপসাগৰৰ জলভাগ আৰু অন্ধ্ৰপ্ৰদেশৰ উপকূলভাগৰ দিশে অগ্ৰসৰ হোৱাৰ সম্ভাৱনা আছে।
শ্ৰী লংকাত ডিটৱা ঘূর্ণিবতাহে ক্ষতি কৰা লোকসকলৰ বাবে ভাৰতৰ পৰা ২৭ টন সাহাৰ্য্য সামগ্ৰী প্ৰেৰণ কৰা হৈছে বুলি বৈদেশিক পৰিক্ৰমা মন্ত্ৰী ড০ এছ. জয়শংকৰে প্ৰকাশ
কৰিছে। সামাজিক মাধ্যমৰ এটা বাৰ্তাত মন্ত্ৰীগৰাকীয়ে উল্লেখ কৰিছে যে আকাশমাৰ্গ আৰু সামুদ্রিক পথেৰে এই
সামগ্ৰীসমূহ কলম্বোলৈ প্ৰেৰণ কৰা হৈছে। ইয়াৰ লগতে উদ্ধাৰকাৰ্যত সহায়ৰ বাবেও এন.ডি.আৰ.এফৰ ৮০ জন জোৱানক শ্ৰীলংকালৈ পঠিওৱা হৈছে।
উল্লেখযোগ্য যে ডিটৱা ঘূর্ণিবতাহত প্ৰভাৱিত লোকসকলৰ সাহায্যৰ বাবে আৰু উদ্ধাৰ অভিযান শক্তিশালী কৰাৰ উদ্দেশ্যে ভাৰত চৰকাৰে অপাৰেচ’ন সাগৰ বন্ধু অভিযানৰ আৰম্ভ কৰিছে। এই অভিযানৰ অধীনতে কালি নিশা বায়ুসেনাৰ হিন্দন বিমান ঘাটিৰ পৰা এখন C-130 আৰু এখন IL-76 বিমান শ্রীলংকালৈ উৰা মাৰিছে বুলি বায়ু সেনা বাহিনীয়ে উল্লেখ কৰিছে।