দক্ষিণ-পশ্চিম বংগোপ সাগৰ আৰু ইয়াৰ গাতে লাগি থকা উত্তৰ শ্ৰীলংকা আৰু তামিলনাডুৰ উপকূল ভাগত সৃষ্টি হোৱা ডিট্ৰা নামৰ ঘূৰ্ণী বতাহজাকে বিগত ছয় ঘণ্টাত প্রতিঘণ্টাত পাঁচ কিলোমিটাৰ বেগেৰ উত্তৰৰ দিশে গতি কৰিছে আৰু বতাহজাক সম্প্ৰতি পুডুচেৰীৰ পৰা প্ৰায় ১৬০ কিলোমিটাৰ দক্ষিণ-দক্ষিণপূবত আৰু চেন্নাইৰ পৰা ২৫০ কিলোমিটাৰ দক্ষিণত কেন্দ্ৰীভূত হৈ আছে। বতাহজাক পৰৱৰ্তী ২৪ ঘণ্টাত উত্তৰৰ দিশে গতি কৰাৰ সম্ভাৱনা আছে। উত্তৰৰ দিশে গতি কৰাৰ সময়ত ঘূৰ্ণী বতাহজাক আজি পুৱা আৰু বিয়লিৰ ভাগলৈ তামিলনাডু আৰু পুডুচেৰীৰ উপকূল ভাগৰ পৰা ৫০ আৰু ২৫ কিলোমিটাৰ নিলগৰ দক্ষিণ-পশ্চিম বংগোপসাগৰৰ জলৰাশিত কেন্দ্ৰীভূত হোৱাৰ সম্ভাৱনা আছে।
আঞ্চলিক বতৰ বিজ্ঞান বিভাগৰ শেহতীয়া তথ্য অনুসৰি ঘূৰ্ণী বতাহজাকৰ ফলত হ’ব পৰা সম্ভাব্য ক্ষয়ক্ষতি ৰোধ কৰাৰ উদ্দেশ্যে কুড্ডালোত আৰু নাগপট্টিনমত ৰেড এলার্ট জাৰি কৰা হৈছে। চেন্নাই আৰু কাঞ্চিপুৰমকে ধৰি ৰাজ্যখনৰ ১২ খন উপকূলীয় জিলাত মজলীয়া বৰষুণ হোৱাৰ আৰু বাকী জিলাসমূহত পাতলীয়া বৰষুণ হোৱাৰ আগলী বতৰা দিয়া হৈছে। ইপিনে আজি অন্ধ্ৰপ্ৰদেশৰ উপকূলভাগ, য়ানম আৰু ৰায়লছিমাৰ অধিকাংশ ঠাইত পাতলীয়াৰ পৰা মজলীয়া আৰু ঠাই বিশেষে ধাৰাষাৰ বৰষুণ হোৱাৰ সম্ভাৱনা আছে। গৃহ পৰিক্ৰমা মন্ত্ৰ্যালয়ে প্ৰকাশ কৰা মতে বিষয়াসকলে উপকূলৰক্ষী বাহিনী আৰু সংশ্লিষ্ট ৰাজ্য তথা কেন্দ্ৰীয় শাসিত অঞ্চলৰ কৰ্তৃপক্ষসমূহৰ সৈতে অহৰহ যোগাযোগ ৰক্ষা কৰি আছে। কেন্দ্ৰীয় গৃহ সচিবে কালি তামিলনাড়ু, পুডুচেৰী, তেলেংগানা আৰু অন্ধ্ৰপ্ৰদেশৰ মুখ্য সচিবসকলৰ সৈতে ঘূৰ্ণী বতাহৰ ফলত হ’ব পৰা ক্ষয়ক্ষতি ৰোধ কৰাৰ প্ৰস্তুতিৰ পৰ্যালোচনা চলায় আৰু তেওঁলোকক সতৰ্ক হৈ থাকিবলৈ আৰু সমন্বয় ৰক্ষা কৰি চলিবলৈ নিৰ্দেশ দিয়ে। উপকূলৰক্ষী বাহিনীয়ে তামিলনাডুৰ উপকূলভাগত তিনিখন জাহাজ আৰু এখন বিমান সাজু কৰি ৰাখিছে আৰু সৰু জাহাজসমূহক বন্দৰলৈ উভতি আহিবলৈ পৰামৰ্শ আগবঢ়াইছে। যিকোনো জৰুৰীকালীন অৱস্থাৰ সন্মুখীন হ’ব পৰাকৈ দুৰ্যোগ সঁহাৰি বাহিনীৰ ১৪ টা দল সাজু কৰি ৰখা হৈছে। ইয়াৰ উপৰি পুনে আৰু বডোডৰাৰ পৰা ৰাষ্ট্ৰীয় দুৰ্যোগ সঁহাৰি বাহিনীৰ ১০ টা অতিৰিক্ত দল বিমানেৰে অনা হৈছে।