অসম গণ পৰিষদ দলে অহা ১৮ নৱেম্বৰত জুবিন গাৰ্গৰ জন্মদিনটো ৰাজ্যজুৰি জাতীয় স্বাভিমান দিৱস হিচাপে পালন কৰাৰ সিদ্ধান্ত লৈছে। এই সন্দৰ্ভত আজি আমবাৰীৰ দলটোৰ মুখ্য কাৰ্যালয়ত এখন সংবাদমেলত দলৰ সাধাৰণ সম্পাদক মনোজ শ‍ইকীয়াই কয়, যে সেইদিনা প্ৰতিখন বিধানসভা সমষ্টিতে অগপৰ জিলা সমিতিয়ে বিস্তৃত কাৰ্যসূচীৰে এই দিৱস পালন কৰিব। সেইদিনা শিল্পীগৰাকীৰ প্ৰতি শ্ৰদ্ধা জনাই নাহৰ পুলি ৰোপণ, প্ৰকৃতিৰ বন্ধু আৰু কিতাপৰ বন্ধুক সম্বৰ্ধনা, জুবিন গাৰ্গৰ গীত পৰিৱেশনৰ উপৰি সন্ধিয়া দলীয় কার্যালয় আৰু ৰাজহুৱা স্থানত বন্তি প্ৰজ্বলন কৰা হ’ব। তদুপৰি অসম যুৱ পৰিষদ আৰু অসম ছাত্ৰ পৰিষদৰ সহস্ৰাধিক সদস্যই সেইদিনা প্ৰতিখন জিলা সদৰত ৰক্তদান শিবিৰৰ আয়োজন কৰিব। ইতিমধ্যে বহুসংখ্যক সদস্যই ৰক্তদানৰ বাবে নাম পঞ্জীয়ন কৰিছে বুলি অগপৰ সাধাৰণ সম্পাদকগৰাকীয়ে জানিবলৈ দিয়ে।