বিকশিত ভাৰত নিয়োগ নিশ্চিতকৰণ আৰু জীৱিকা অভিযান গ্রামীণ বা জি ৰাম জি আঁচনি কাৰ্যকৰী কৰা সন্দৰ্ভত ৰাজ্যৰ বিভিন্ন প্ৰান্তত ভালেমান কার্যসূচী অনুষ্ঠিত হৈছে। নলবাৰী কৃষি বিজ্ঞান কেন্দ্ৰত এই উপলক্ষে আযোজিত অনুষ্ঠানত যোৰহাটৰ অসম কৃষি বিশ্ববিদ্যালয়ৰ উপাচাৰ্য্য ড০ বিদ্যুৎ চন্দন ডেকাই অংশগ্ৰহণ কৰে। তেওঁ কৃষকসকলক চৰকাৰী আঁচনিসমূহৰ সুবিধা গ্ৰহণ কৰিবলৈ আগুৱাই অহাৰ বাবে আহ্বান জনায়। উল্লেখযোগ্য যে এই অভিলাষী আঁচনিখনৰ অধীনত ১ লাখ ৫১ হাজাৰ কোটি টকা ব্যয়ৰ প্ৰস্তাৱ লোৱা হৈছে। শ্ৰমিকসকলক পূৰ্বৰ ১০০ দিনৰ পৰিৱৰ্তে বিধিগতভাৱে বৰ্তমান ১২৫ দিনৰ নিয়োগ নিশ্চিত কৰা হৈছে ।
এই আঁচনিখন সন্দৰ্ভত আকাশবাণীৰ সঞ্চালকালয়ৰ নিৰ্দেশ অনুযায়ী আজি নিশা ৮ বাজি ২ মিনিটত আকাশবাণী গুৱাহাটী কেন্দ্ৰৰ বাতৰি বিভাগে এটা পডকাষ্ট প্ৰচাৰ কৰিব। পঞ্চায়ত আৰু গ্ৰামোন্নয়ন মন্ত্ৰী ৰণজিৎ কুমাৰ দাসৰ সৈতে এই পডকাষ্টত অংশগ্ৰহণ কৰিব আকাশবাণী গুৱাহাটী কেন্দ্ৰৰ সংবাদদাতা আমিনুল হক জোদ্দাৰ আৰু সম্পাদনা কাৰ্যবাহী পৰিস্মিতা দিহিঙীয়াই। এই অনুষ্ঠান আকাশবাণী গুৱাহাটীৰ বাতৰি বিভাগৰ ইউটিউব চেনেলযোগে প্ৰচাৰিত হব।
