■■■ জাপানৰ প্ৰযুক্তি আৰু ভাৰতীয় প্ৰতিভাৰ সন্মিলিত প্রচেষ্টাই এই শতিকাৰ প্ৰযুক্তি বিপ্লৱক নেতৃত্ব দিব পাৰে। টকিঅ’ত অনুষ্ঠিত ভাৰত-জাপান অর্থনৈতিক মঞ্চ সম্বোধন কৰি প্ৰধানমন্ত্ৰী নৰেন্দ্ৰ মোদীয়ে আজি এইদৰে কয়। প্রধানমন্ত্ৰী শ্ৰীমোদীয়ে জাপানক প্ৰযুক্তিৰ আৰু ভাৰতক প্ৰতিভাৰ পাৱাৰহাউছ বুলি অভিহিত কৰে। ভাৰতে কৃত্রিম বুদ্ধিমত্তা, অর্ধপৰিবাহী, কোৱান্টাম কম্পিউটিং, জৈৱ প্ৰযুক্তি আৰু মহাকাশ খণ্ডত শক্তিশালী আৰু অভিলাষী পদক্ষেপ লৈছে। তেওঁ লগতে কয় যে ভাৰতে প্ৰতিৰক্ষা আৰু মহাকাশ খণ্ডৰ পাছতে পৰমাণু শক্তি খণ্ড ব্যক্তিগত উদ্যমীৰ বাবে মুকলি কৰি দিছে। প্রধানমন্ত্রী শ্রীমোদীয়ে কয় যে ভাৰতৰ উন্নয়নৰ যাত্ৰাত জাপান সদায় গুৰুত্বপূৰ্ণ সহযোগী হৈ আহিছে। মেটোৰ পৰা নিৰ্মাণ খণ্ডলৈ, অর্ধপৰিবাহীৰ পৰা ষ্টাৰ্ট আপলৈ ভাৰত-জাপানৰ অংশীদাৰিত্ব সকলো খণ্ডতে পাৰস্পৰিক বিশ্বাসৰ প্ৰতীক হিচাপে পৰিগণিত হৈছে। জাপানৰ কোম্পানীসমূহে ৪ হাজাৰ কোটি ডলাৰ বিনিয়োগ কৰিছে।
প্রধানমন্ত্ৰী নৰেন্দ্ৰ মোদীয়ে কয় যে ভাৰত-জাপান সহযোগিতা নিৰ্মাণ আৰু অটো খণ্ডত সফল হিচাপে পৰিগণিত হৈছে। এই সফলতা ৰবটিক্স বেটাৰী, অর্ধপৰিবাহী, জাহাজ নিৰ্মাণ আৰু পাৰমাণৱিক শক্তি খণ্ডতো প্রতিফলিত কৰিব পাৰি। তেওঁ কয় যে চুজুকি আৰু ডেক্কানৰ সাফল্য আনৰ বাবে সফলতাৰ কাহিনী হ’ব পাৰে। প্ৰধানমন্ত্রী শ্রীমোদীয়ে ভাৰত তথা বিশ্ব নিৰ্মাণৰ ক্ষেত্ৰত সকলোকে আগবাঢ়ি আহিবলৈ আহ্বান জনাইছে।
প্রধানমন্ত্রী শ্রীমোদীয়ে ভাৰতৰ ৰাজনৈতিক, অর্থনৈতিক স্থিৰতা বিষয়ত আলোকপাত কৰাৰ লগতে নীতিৰ ক্ষেত্ৰত স্বচ্ছতাৰ দিশটোও দোহাৰে। ভাৰত বৰ্তমান বিশ্বৰ দ্ৰুত বিকাশশীল বৃহৎ অর্থনীতি আৰু অচিৰেই ভাৰতৰ বিশ্বৰ তৃতীয় বৃহৎ অর্থনৈতিক শক্তি হোৱাৰ দিশত অগ্ৰসৰ হৈছে। সংস্কাৰ, প্ৰদৰ্শন আৰু পৰিৱৰ্তনৰ জৰিয়তে ভাৰতে এই পৰ্যায়লৈ অগ্ৰসৰ হোৱা বুলিও প্রধানমন্ত্ৰীগৰাকীয়ে প্ৰকাশ কৰে। একেটা অনুষ্ঠানতে জাপানৰ প্ৰধানমন্ত্ৰী শ্বিগেৰু ইছিবাই কয় যে জাপানৰ উন্নত প্রযুক্তি আৰু ভাৰতৰ আশ্চৰ্যকৰ প্ৰতিভাই দুয়ো দেশৰ অৰ্থনৈতিক সম্বন্ধক নেতৃত্ব দি আহিছে। মেক ইন ইণ্ডিয়া সফল কৰি তোলাৰ ক্ষেত্ৰত ভালেসংখ্যক জাপানী কোম্পানীয়ে মুখ্য ভুমিক্য গ্রহণ কৰাৰ কথাও জাপানৰ প্ৰধানমন্ত্ৰীয়ে তেওঁৰ ভাষণত উল্লেখ কৰে।
● জাপান ভ্রমণ সামৰি প্রধানমন্ত্ৰীগৰাকীয়ে চীনৰ ৰাষ্ট্ৰপতি শ্বি জিনপিঙৰ আমন্ত্ৰণ মৰ্মে টিয়ানজিনত হ’বলগীয়া চাংহাই সহযোগিতা সংস্থাৰ সন্মিলনত ভাগ লোৱাৰ উদ্দেশ্যে চীনলৈ যাব। উল্লেখযোগ্য যে ভাৰত, চাংহাই সহযোগিতা সংস্থাৰ সক্ৰিয় সদস্য। প্রধানমন্ত্ৰীয়ে কয়, যে উমৈহতীয়া সমস্যাৰ সমাধান আৰু আঞ্চলিক সহযোগিতা গভীৰ কৰি তোলাৰ বাবে চাংহাই সহযোগিতা সংস্থাৰ সদস্য ৰাষ্ট্ৰসমূহৰ সৈতে একেলগে কাম কৰিবলৈ ভাৰত প্ৰতিশ্ৰুতিবদ্ধ। শ্রীমোদীয়ে কয়, যে চাংহাই সহযোগিতা সংস্থাৰ শীৰ্ষ সন্মিলনৰ আপাহতে ৰাষ্ট্ৰপতি শ্বি জিনপিন, ৰাছিয়াৰ ৰাষ্ট্ৰপতি ভ্লাডিমিৰ পুৰ্টিন আৰু অন্য নেতাসমূহৰ সৈতে হ’বলগীয়া বৈঠকলৈ তেওঁ আগ্ৰহেৰে বাট চাই আছে।