প্রধানমন্ত্ৰী নৰেন্দ্ৰ মোদীয়ে আজি ছত্তিশগড়ত অনুষ্ঠিত আৰক্ষী সঞ্চালক প্রধান আৰু আৰক্ষী মহাপৰিদৰ্শকসকলৰ ৬০ সংখ্যক সৰ্বভাৰতীয় সন্মিলনত অধ্যক্ষতা কৰে। কেন্দ্ৰীয় গৃহ মন্ত্ৰী অমিত শ্বাহে নৱা ৰাইপুৰত অনুষ্ঠিত তিনিদিনীয়া সন্মিলন মুকলি কৰে। এই উপলক্ষে শ্ৰী শ্বাহে কয়, যে এই সন্মিলনক অভ্যন্তৰীণ সুৰক্ষাৰ সমাধানৰ পৰ্টেল হিচাপে গঢ় দিয়া হৈছে। এই সন্মিলনে কৌশলগত আৰু নীতি প্ৰস্তুতকৰণৰ বাবে আদর্শগত ভেটি গঢ়ি তুলিছে বুলি শ্ৰী শ্বাহে মন্তব্য কৰে। কেন্দ্ৰীয় গৃহ মন্ত্ৰীগৰাকীয়ে কয, যে দেশে বিগত ১১ বছৰত মৌলবাদ, উগ্রবাদ, সন্ত্রাসবাদ আৰু মাদকদ্রব্য বিৰোধী অভিযানত চকুতলগা ধৰণৰ অগ্ৰগতি লাভ কৰিছে। নতুন যুগৰ প্ৰত্যাহ্বানৰ পৰা দেশক সুৰক্ষিত কৰাৰ বাবে সঠিক চোৰাংচোৱা তথ্য, লক্ষ্যৰ স্পষ্টতা আৰু কাৰ্যৰ ক্ষেত্ৰত সম্বন্নয় জৰুৰী বুলি মন্ত্ৰীগৰাকীয়ে প্ৰকাশ কৰে। শ্ৰীশ্বাহে কয়, যে সন্মিলনত হোৱা আলোচনাই বিকশিত ভাৰত গঢ়াৰ লক্ষ্য অনুযায়ীশান্তি-শৃংখলা ৰক্ষাৰ বাবে বিশদ পৰিকল্পনা যুগোতাই উলিউৱাত সহায় কৰিব। সন্মিলনত গৃহমন্ত্ৰীগৰাকীয়ে বিশিষ্ট আৰক্ষী সেৱা পদক প্ৰদান কৰে আৰু তিনিখন শ্ৰেষ্ঠ থানাক ট্ৰফী প্ৰদান কৰে। সন্মিলনত ৰাষ্ট্ৰীয় সুৰক্ষা উপদেষ্টা অজিত দোভাল, কেন্দ্ৰীয় গৃহ ৰাজ্য মন্ত্ৰী নিত্যানন্দ ৰায়, বিভিন্ন ৰাজ্য আৰু কেন্দ্ৰীয় শাসিত অঞ্চলৰ আৰক্ষী সঞ্চালক প্ৰধান আৰু কেন্দ্ৰীয় আৰক্ষী সংস্থাসমূহৰ মুৰব্বীসকলে অংশগ্ৰহণ কৰিছে।
চৰকাৰে সোমবাৰে আৰম্ভ হ’বলগীয়া সংসদৰ শীতকালীন অধিবেশনৰ পূর্বে কাইলৈ এখন সর্বদলীয় বৈঠকৰ আহ্বান কৰিছে। বৈঠকত সংসদীয় পৰিক্ৰমা মন্ত্ৰী কিৰেণ ৰিজিজুৱে সংসদৰ উভয় সদনত ৰাজনৈতিক দলসমূহৰ নেতাসকলক সাক্ষাৎ কৰিব। বৈঠকত চৰকাৰে শীতকালীন অধিবেশনৰ সময়ছোৱাত লোকসভা আৰু ৰাজ্যসভাৰ কাম-কাজ সুচাৰুৰূপে সম্পন্ন হোৱাতো সুনিশ্চিত কৰাৰ বাবে সকলো ৰাজনৈতিক দলৰ সহায় সহযোগিতা বিচাৰিব। ১৯ ডিচেম্বৰ পৰ্যন্ত চলিবলগীয়া এই অধিবেশনৰ সময়ছোৱাত আলোচনা আৰু বিবেচনাৰ বাবে কেইবাখনো গুৰুত্বপূৰ্ণ বিধেয়ক সদনত উত্থাপন কৰা হ’ব।