ছটা জনগোষ্ঠীৰ জনজাতিকৰণ সম্পৰ্কীয় মন্ত্রীগোটৰ প্ৰতিবেদন কালি শীতকালীন অধিবেশনৰ অন্তিম দিনা বিধানসভাত দাখিল কৰা হয়। শিক্ষামন্ত্রী ডা০ ৰণোজ পেণ্ডৱে বিধানসভাত এই প্রতিবেদন দাখিল কৰে। ইয়াৰ লগে লগে এই জনগোষ্ঠীসমূহৰ জনজাতিকৰণৰ ক্ষেত্ৰত থকা আঁসোৱাহ দূৰ হোৱাৰ পথ প্রশস্ত হৈছে। বর্তমান জনজাতিসকলে লাভ কৰি থকা সা-সুবিধাত ব্যাঘাত নোহোৱাকৈ নতুনকৈ জনজাতিৰ মৰ্যাদা লাভ কৰা সকলে নিজৰ প্ৰাপ্য সা-সুবিধা লাভ কৰিব বুলি মন্ত্ৰীগৰাকীয়ে প্ৰকাশ কৰে। অৱশ্যে মন্ত্রীগোটৰ প্ৰতিবেদনে সমগ্ৰ বিষয়টো কেন্দ্ৰীয় চৰকাৰৰ অনুমোদনৰ বাবে প্ৰেৰণ কৰিব। এই প্রতিবেদন অনুসৰি অসমত অনুসূচিত জনজাতি ভৈয়াম, পাহাৰ আৰু উপত্যকা এই তিনিটা ভাগত ভাগ কৰা হ’ব। প্রতিবেদনত লগতে সাংবিধানিক সংশোধনীৰ জৰিয়তে ষষ্ঠ অনুসূচীৰ লোকসভা সমষ্টিসমূহ স্থায়ীভাবে অনুসূচিত জনজাতিৰ বাবে সংৰক্ষণ প্ৰস্তাৱ দিয়া হৈছে।
টাই আহোমকে ধৰি ছটা জনগোষ্ঠীক জনজাতিকৰণ সন্দৰ্ভত মন্ত্রীগোটে দাখিল কৰা প্ৰতিবেদনক লৈ জনগোষ্ঠীকেইটাৰ সংগঠনে ৰাজ্য চৰকাৰক ধন্যবাদ জ্ঞাপন কৰিছে।
শিৱসাগৰত কালি দৌলমুখ চাৰিআলিত টাই আহোম যুৱ পৰিষদে চৰকাৰৰ স্থিতিক আদৰণী জনাই আনন্দ-উল্লাস কৰে।
ইপিনে অসম বিধানসভাত এই প্রতিবেদন দাখিল হোৱাক লৈ কালি কোকৰাঝাৰত জনজাতীয় ছাত্র সমাজে প্রতিবাদমুখৰ পৰিস্থিতিৰ সৃষ্টি কৰে। অৱশ্যে জিলা প্রশাসন আৰু আৰক্ষী প্রশাসনে পৰিস্থিতি নিয়ন্ত্রণ কৰে।
