কেন্দ্ৰীয় গৃহমন্ত্ৰী অমিত শ্বাহৰ দুদিনীয়া অসম ভ্রমণে ৰাজ্যৰ শান্তি, উন্নতি আৰু শক্তিশালী আন্তঃগাঁথনি সৃষ্টিৰ যাত্ৰাক নতুন মাত্ৰা প্ৰদান কৰিলে বুলি মুখ্যমন্ত্ৰী ড° হিমন্ত বিশ্ব শৰ্মাই প্ৰকাশ কৰিছে। কেন্দ্ৰীয় গৃহমন্ত্ৰীগৰাকীয়ে কালি অসম ৰাজভৱনৰ ব্ৰহ্মপুত্ৰ শাখাকে ধৰি বহুকেইটা প্ৰকল্পৰ উদ্বোধন আৰু আধাৰশিলা স্থাপন কৰে। শ্ৰী শ্বাহে কেইবাটাও অনুষ্ঠানত ভাগ লোৱাৰ উপৰি খানাপাৰাত নির্মীয়মান জ্যোতি-বিষ্ণু প্ৰেক্ষাগৃহ পৰিদৰ্শন কৰে।
অসমৰ প্ৰাক্তন মুখ্যমন্ত্ৰী গোলাপ বৰবৰাৰ জন্ম শতবার্ষিকী উদযাপন উপলক্ষে শ্ৰীমন্ত শংকৰদেৱ কলাক্ষেত্ৰত আয়োজিত অনুষ্ঠানত অংশ লৈ কেন্দ্ৰীয় গৃহমন্ত্ৰীগৰাকীয়ে প্ৰয়াত মুখ্যমন্ত্ৰীগৰাকীৰ প্ৰতি শ্ৰদ্ধা নিবেদন কৰে। শ্ৰী শ্বাহে তেওঁৰ ভাষণত গোলাপ বৰবৰাৰ কৰ্মময় জীৱন সন্দৰ্ভত আলোকপাত কৰে। দেশৰ জনগাঁথনিৰ ক্ষেত্ৰত গ্ৰহণ কৰা গুৰুত্বপূৰ্ণ সিদ্ধান্ত সন্দৰ্ভত শ্রী শ্বাহে কয়, যে প্রধানমন্ত্ৰী নৰেন্দ্ৰ মোদীৰ নেতৃত্বত কেন্দ্ৰীয় চৰকাৰে জনগাঁথনিগত পৰিৱৰ্তন ৰোধ কৰাৰ বাবে মহা অভিযান আৰম্ভ কৰিবলৈ আগবাঢ়িছে। ইয়াৰ অধীনত এখন জনগাঁথনি আয়োগ গঠন কৰা হ’ব বুলি তেওঁ উল্লেখ কৰে।
ইয়াৰ পূৰ্বে শ্ৰী শ্বাহে খানাপাৰাত প্ৰথম পঞ্চায়ত প্রতিনিধি সন্মিলনত ভাগ লৈ প্ৰধানমন্ত্ৰী নৰেন্দ্ৰ মোদীৰ উন্নয়নমূলক কামকাজৰ প্ৰবাহ অসমৰ প্ৰান্তে প্রান্তে বিয়পাই দিয়া মুখ্যমন্ত্রী ড° হিমন্ত বিশ্ব শৰ্মা নেতৃত্বাধীন ৰাজ্য চৰকাৰৰ শলাগ লয়। তেওঁ এই উন্নয়নৰ ধাৰাবাহিকতা অটুট ৰখাৰ বাবে সকলো পঞ্চায়ত প্রতিনিধিকে নিষ্ঠাৰে জনকল্যাণ সাধনৰ প্ৰয়াস অব্যাহত ৰাখিবলৈ আহ্বান জনায়। শ্রী শ্বাহে এই সন্মিলনৰ পৰাই ২০২৬ চনৰ বিধানসভা নিৰ্বাচনৰ কুচকাৱাজ আৰম্ভ কৰে। এই সন্মিলনতে মুখ্যমন্ত্ৰী ড° শৰ্মাই অহা ১ জানুৱাৰীৰ পৰা পঞ্চায়ত প্ৰতিনিধি তথা তেওঁলোকৰ পৰিয়ালৰ সদস্যসকলৰ চিকিৎ‍সাৰ ব্যয় চৰকাৰে বহন কৰিব বুলি ঘোষণা কৰে। ড° শৰ্মাই ভৱিষ্যত প্ৰজন্মৰ বাবে এখন নিৰাপদ আৰু সমৃদ্ধিশালী ৰাজ্য নিৰ্মাণ কৰাত গুৰুত্ব আৰোপ কৰে।