কৰ্কট ৰোগৰ ক্ষেত্ৰত সাৱধানতা অৱলম্বন আৰু ব্যাপক সজাগতা সৃষ্টিৰ বাবে আজি ৰাষ্ট্ৰীয় কৰ্কট সজাগতা দিৱস পালন কৰা হৈছে। এই দিৱস ২০১৪ চনৰ ৭ নৱেম্বৰৰ পৰা প্ৰতি বছৰে পালন কৰি অহা হৈছে। এই দিৱসৰ জৰিয়তে এই ৰোগৰ প্ৰতিৰোধ, আৰম্ভণিতেই ৰোগ চিনাক্তকৰণ আৰু উপযুক্ত চিকিৎসা সন্দৰ্ভত জনসাধাৰণৰ মাজত সজাগতা সৃষ্টিৰ প্ৰয়াস কৰি অহা হৈছে। কৰ্কট ৰোগৰ চিকিৎসাৰ ক্ষেত্ৰত গুৰুত্বপূর্ণ ভূমিকা গ্ৰহণ কৰি অহা ৰেডিয়াম আৰু প’ল’নিয়ামৰ আৱিষ্কাৰক তথা প’লেণ্ড-ফ্ৰান্সৰ ৰসায়নবিদ মেৰী কুৰীৰ জন্ম দিৱসো আজিৰ দিনটোতেই উদযাপন কৰি অহা হৈছে।
ৰাষ্ট্ৰীয় কৰ্কট সজাগতা দিৱসত দেশৰ চৰকাৰী চিকিৎসালয়, কেন্দ্ৰীয় চৰকাৰৰ স্বাস্থ্য আঁচনি আৰু পৌৰ স্বাস্থ্য কেন্দ্ৰসমূহত জনসাধাৰণৰ বিনামূলীয়া পৰীক্ষাৰ ব্যৱস্থা কৰা হয়। এই দিৱস পালনৰ বিষয়ে ২০১৪ চনৰ ছেপ্তেম্বৰত তদানীন্তন কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰী ড° হর্ষবর্ধনে ঘোষণা কৰিছিল। তেতিয়াৰে পৰা দেশত এই ৰোগৰ ক্ষেত্ৰত সজাগতা সৃষ্টিৰ বাবে দিৱসৰ কাৰ্যসূচী গ্ৰহণ কৰি অহা হৈছে।