কেন্দ্ৰীয় চৰকাৰে ৰূপায়ণ কৰা নতুন শ্রম সংহিতাই সমগ্ৰ দেশৰ শ্ৰমিকৰ জীৱিকাত সুস্থিৰতা প্ৰদান কৰাৰ আশা কৰা হৈছে। আকাশবাণীৰ সংবাদদাতাই প্ৰকাশ কৰা প্ৰতিবেদন অনুসৰি এই নতুন সংস্কাৰে দেশৰ শ্ৰমিকসকলক প্ৰত্যক্ষ সুবিধা প্ৰদান কৰিছে। এই শ্রম সংস্কাৰৰ জৰিয়তে চৰকাৰে দেশৰ বিভিন্ন খণ্ডত শ্রমিক শাসন ব্যৱস্থা শক্তিশালী কৰিছে। এই সংস্কাৰৰ অধীনত কোনো নিয়োগকাৰীয়ে কৰ্মচাৰীক ন্যূনতম মজুৰিতকৈ কম দৰমহা দিব নোৱাৰিব। সাধাৰণ কৰ্ম সময়ৰ বাহিৰত কৰা কামৰ ক্ষেত্ৰত নিয়মীয়া মজুৰি হাৰতকৈ দুগুণ ক্ষতিপূৰণ দিব লাগিব। লগতে এই নতুন শ্রম সংহিতাই অসংগঠিত শ্রমিকসকলৰ বাবে কল্যাণমূলক আঁচনিৰ প্ৰাপ্যতা নিশ্চিত কৰাৰ লগতে স্বাস্থ্য আৰু প্ৰসূতিৰ সুবিধা তথা বৃদ্ধাৱস্থা সুৰক্ষা আদি প্ৰদান কৰিব। তদুপৰি এই সংশোধিত নীতিসমূহ কাৰ্যকৰী হোৱাৰ লগে লগে বাসস্থানৰ পৰা কৰ্মস্থলীলৈ অহা-যোৱা কৰাৰ সময়ত অথবা কৰ্তব্য পালন কৰি উভতি অহাৰ সময়ত যদি কোনো দুর্ঘটনা সংঘটিত হয়, তেতিয়া এনে দুৰ্ঘটনাৰ ক্ষতিপূৰণ আদায় দিয়া হ’ব।