কেন্দ্রীয় বিত্ত ৰাজ্য মন্ত্রী তথা সাতবাৰকৈ সাংসদৰূপে নির্বাচিত হোৱা পংকজ চৌধাৰী উত্তৰ প্ৰদেশ বিজেপিৰ সভাপতি হিচাপে নির্বাচিত হৈছে। আজি লক্ষ্ণৌত কেন্দ্ৰীয় মন্ত্রী তথা বিজেপিৰ নিৰ্বাচনৰ দায়িত্বত থকা পীয়ুষ গোৱেলে এই কথা আনুষ্ঠানিকভাবে ঘোষণা কৰে। ৰাজ্যিক সভাপতিৰ লগতে বিজেপিয়ে উত্তৰ প্ৰদেশৰ পৰা ৰাষ্ট্ৰীয় পৰিষদলৈ সদস্য বাচনিৰ বাবেও নির্বাচন অনুষ্ঠিত কৰে। ৰাজনাথ সিং, যোগী আদিত্যনাথ, কেশব প্রসাদ মৌর্য, ভূপেন্দ্ৰ চৌধুৰী, স্মৃতি ইৰাণীকে ধৰি ১২০ গৰাকী নতুন সদস্য নির্বাচন কৰা হয়।
প্ৰতিৰক্ষা মন্ত্ৰী ৰাজনাথ সিঙে উত্তৰ প্ৰদেশ বিজেপিৰ সভাপতি হিচাপে নির্বাচিত হোৱাৰ বাবে পংকজ চৌধাৰীক অভিনন্দন জনাইছে। সামাজিক মাধ্যমৰ এটা পোষ্টত শ্রী সিঙে কয়, যে সাতবাৰকৈ সাংসদৰূপে নির্বাচিত হোৱা শ্রী চৌধাৰী দলৰ প্ৰতি দায়বদ্ধ আৰু নিয়মানুবর্তী কর্মী হিচাপে পৰিচিত। শ্রী চৌধাৰীৰ দীঘলীয়া ৰাজনৈতিক অভিজ্ঞতা আৰু দক্ষতাপন্ন কামকাজে দলটোক ৰাজ্যখনক অধিক শক্তিশালী কৰি তুলিব বুলি তেওঁ আশা প্রকাশ কৰে।
