● কাবুলত কালি কেইবাটাও বিস্ফোৰণৰ ঘটনা সংঘটিত হোৱাৰ পৰিপ্ৰেক্ষিতত পাকিস্তান আৰু আফগানিস্তানৰ মাজত উত্তেজনা পুনৰ বৃদ্ধি পাইছে। দেশখনৰ কেইবাটাও চৰকাৰী প্ৰতিষ্ঠান আৰু আবাসিক স্থলেৰে সমৃদ্ধ পূব কাবুলত সংঘটিত এই বিস্ফোৰণৰ ঘটনাৰ ফলত অঞ্চলটোত আতংকৰ পৰিবেশ সৃষ্টি হয়। তালিবানৰ প্ৰধান মুখপাত্রই এই আক্ৰমণৰ ঘটনাৰ বিষয়ে নিশ্চিত কৰি দি কয় যে তেওঁলোকে ইতিমধ্যে এই সন্দৰ্ভত অনুসন্ধান আৰম্ভ কৰিছে।
উল্লেখযোগ্য যে এই ঘটনাৰ আঁৰৰ কাৰণ বৰ্তমানলৈ উদঘাটন হোৱা নাই যদিও প্রাথমিক তথ্য অনুসৰি এয়া বিমান আক্ৰমণৰ ঘটনা বুলি সন্দেহ প্ৰকাশ পাইছে আৰু ইয়াৰ ফলত অঞ্চলটোত সংঘাত বৃদ্ধি পোৱাৰ আশংকা কৰা হৈছে।
