■ কাছাৰ জিলাৰ বিভিন্ন উন্নয়নমূলক প্ৰকল্পৰ অগ্ৰগতি পর্যালোচনা কৰি ৰাজ্যপাল লক্ষ্মণ প্রসাদ আচার্যই সন্তুষ্টি প্ৰকাশ কৰিছে। ৰাজ্যপালগৰাকীয়ে কালি শিলচৰৰ কাছাৰ জিলা প্ৰশাসনৰ কাৰ্যালয়ত অনুষ্ঠিত এখন পর্যালোচনা বৈঠকত বিভাগীয় বিষয়াসকলৰ সৈতে মিলিত হয়। পাছত তেওঁ সাংবাদিকৰ আগত কয়, যে কাছাৰৰ উন্নয়নমূলক কামকাজত তেওঁ সন্তুষ্টি লাভ কৰিছে। এই প্রচেষ্টাই অনাগত দিনত জিলাখনত অধিক উন্নয়নৰ পথ মুকলি কৰিব বুলিও তেওঁ আশা প্রকাশ কৰে।
দুদিনীয়া ভ্ৰমণসূচীৰে শিলচৰলৈ যোৱা ৰাজ্যপালগৰৰাকীয়ে নিচামুক্ত সমাজ গঢ়াৰ বাবে যোগ শিক্ষাৰ ওপৰত গুৰুত্ব আৰোপ কৰিবলৈ আহ্বান জনায়। তেওঁ যুৱক-যুৱতীসকলক ৰাষ্ট্ৰীয় শিক্ষার্থী বাহিনী আৰু ৰাষ্ট্ৰীয় সেৱা আঁচনিত অন্তৰ্ভুক্ত হ’বলৈ উৎসাহিত কৰে। তেওঁ লগতে ৰাজ্যখনক যক্ষ্মামুক্ত কৰাৰ বাবে নিক্ষয়মিত্ৰ পদক্ষেপক অধিক জনপ্ৰিয় কৰিবলৈ আহ্বান জনায়। ৰাজ্যপাল শ্ৰী আচাৰ্যই আজি ৰামকৃষ্ণ মিছন পৰিদৰ্শন কৰাৰ লগতে ৰেডক্ৰছ শিশু চিকিৎসালয়ো পৰিদৰ্শন কৰিব।