■ বিধি বলৱৎকাৰী সঞ্চালকালয়ে বেংক জালিয়াতিৰ গোচৰত জড়িত থকাৰ অভিযোগত কনকাষ্ট ষ্টিল এণ্ড পাৱাৰ লিমিটেড আৰু ইয়াৰ মুখ্য পৰিচালন সঞ্চালক সঞ্জয় কুমাৰ সুৰেখাৰ ২৯৬ কোটি টকাৰো অধিক পৰিমাণৰ সম্পত্তি বাজেয়াপ্ত কৰিছে। এই সম্পত্তিসমূহৰ ভিতৰত- পশ্চিমবংগ, ওড়িশা আৰু ঝাৰখণ্ডত থকা ভূমি সম্পত্তিসমূহ অন্যতম। বিধি বলৱৎকাৰী সঞ্চালকালয়ে এই গোচৰ সন্দৰ্ভত অধিক তথ্যৰ বাবে তদন্ত অব্যাহত ৰাখিছে।
সঞ্চালকালয়ে লগতে ৰিয়েল ষ্টেট কেলেংকাৰিৰ সৈতে জড়িত থকাৰ অভিযোগত ডব্লিউ টি চি ফৰিদাবাদ ইনফ্রাস্ট্রাকচাৰ প্রাইভেট লিমিটেড আৰু অন্যান্য প্ৰতিষ্ঠানৰ ২,৩৪৮ কোটি টকাৰো অধিক মূল্যৰ সম্পত্তি বাজেয়াপ্ত কৰিছে। বাজেয়াপ্ত সম্পত্তিসমূহৰ ভিতৰত ৰাষ্ট্ৰীয় ৰাজধানীক্ষেত্ৰ দিল্লী, গুৰুগ্ৰাম, ফৰিদাবাদ, নয়দা আৰু গোৱাত থকা ভূমি আৰু বিক্ৰী নোহোৱাকৈ থকা সম্পত্তি আছে বুলি সঞ্চালকালয়ে প্ৰকাশ কৰিছে।