উচ্ছেদৰ সময়ত কোনো লোকে আৰক্ষীক আক্ৰমণ কৰিলে তেওঁলোকৰ বিৰুদ্ধে ব্যৱস্থা লোৱা হ’ব বুলি মুখ্যমন্ত্ৰী ড০ হিমন্ত বিশ্ব শৰ্মাই আজি গুৱাহাটী আজাৰাত মন্তব্য কৰে। তেওঁ কয়, যে আৰক্ষীক আক্ৰমণ কৰা উচ্ছেদিতৰ বিৰুদ্ধে গোচৰ ৰুজু কৰা হ’ব। গোৱালপাৰাৰ পাইকানত আৰক্ষীক একাংশ উচ্ছেদিত লোকে আক্ৰমণ কৰা সন্দৰ্ভত তেওঁ এইদৰে কয়। উচ্ছেদৰ পাছত পাইকান সংৰক্ষিত বনাঞ্চলত গছপুলি ৰোপণৰ লক্ষ্য লোৱা হৈছে বুলিও তেওঁ কয়। এনে গছপুলি ৰোপণৰ জৰিয়তে ভূমিসমূহ বনাঞ্চললৈ ৰূপান্তৰ কৰা হ’ব বুলি তেওঁ উল্লেখ কৰে। মুখ্যমন্ত্ৰী ড০ শৰ্মাই আজি কেওটপাৰাৰ মনসা দেৱী মন্দিৰত উপস্থিত হৈ ৰাজ্যবাসীৰ কল্যাণার্থে দেৱীৰ চৰণত সেৱা আগবঢ়ায়। তেওঁ মন্দিৰ চৌহদ পৰিদৰ্শন কৰাৰ লগতে স্থানীয় লোকৰ সৈতে মত বিনিময় কৰে।