কেন্দ্রীয় গৃহমন্ত্রী অমিত শ্বাহে কালি চত্তিশগড়ৰ ৰায়পুৰত অনুষ্ঠিত আৰক্ষী সঞ্চালকপ্ৰধান আৰু আৰক্ষী মহা-পৰিদৰ্শকসকলৰ সৰ্ব ভাৰতীয় সন্মিলনৰ ৬০ সংখ্যক সংস্কৰণ উদ্বোধন কৰে। শ্ৰীশ্বাহে ভাষণ প্ৰসংগত প্রধানমন্ত্ৰী নৰেন্দ্ৰ মোদীৰ গতিশীল নেতৃত্বত দেশৰ আভ্যন্তৰীণ নিৰাপত্তাজনিত প্ৰত্যাহ্বানসমূহৰ মোকাবিলা কৰাৰ লগতে বিভিন্ন সমস্যা চিহ্নিত কৰি তাৰ সমাধানৰ বাবে শক্তিশালী নীতি প্ৰস্তুত কৰাত চৰকাৰ সফল হৈছে বুলি প্ৰকাশ কৰে।
নক্সালবাদৰ প্ৰসংগত শ্ৰীশ্বাহে কয়, যে বিগত ৭ বছৰত কেন্দ্ৰীয় চৰকাৰে নিৰাপত্তা ব্যৱস্থা শক্তিশালী কৰাৰ উদ্দেশ্যে দুর্গম অঞ্চলত ৫৮৬ খন আৰক্ষী চকী স্থাপন কৰিছে। ইয়াৰ ফলত নক্সাল অধ্যুষিত জিলাৰ সংখ্যা ২০১৪ চনত ১২৬ খনৰ পৰা বৰ্তমান ১১ খনলৈ হ্ৰাস পাইছে। পৰৱৰ্তী সন্মিলনৰ পূৰ্বেই দেশ সম্পূৰ্ণৰূপে নক্সালমুক্ত হ’ব বুলিও শ্ৰীশ্বাহে আশা প্রকাশ কৰে ।
সীমান্ত নিৰাপত্তা ব্যৱস্থাৰ প্ৰত্যাহ্বান সন্দৰ্ভত গৃহমন্ত্ৰীগৰাকীয়ে কয়, যে চৰকাৰে নক্সালবাদ, উত্তৰ- পূৰ্বাঞ্চল আৰু জম্মু-কাশ্মীৰৰ উগ্রবাদ তথা সীমা সমস্যাৰ স্থায়ী সমাধানৰ বাবে ব্যৱস্থা গ্ৰহণ কৰিছে। কেন্দ্ৰীয় গৃহমন্ত্ৰীগৰাকীয়ে চৰকাৰে গ্ৰহণ কৰা ব্যৱস্থাসমূহৰ বিষয়ে আলোকপাত কৰি কয়, যে ৰাষ্ট্ৰীয় নিৰাপত্তা সংস্থাসমূহক অধিক শক্তিশালী কৰাৰ লগতে দেশত তিনিখন নতুন ফৌজদাৰী আইনৰ প্ৰৱৰ্তন আৰু মাদক দ্ৰব্য তথা সংগঠিত অপৰাধৰ বিৰুদ্ধে কঠোৰ আইনৰ ব্যৱস্থা কৰিছে ।