আন্তঃৰাষ্ট্ৰীয় মহাকাশ কেন্দ্র, আই. এছ. এছ. ভ্ৰমণ কৰা প্ৰথমগৰাকী ভাৰতীয় গ্ৰুপ কেপ্টেইন শুভাংশু শুক্লাই মহাকাশত অৱস্থিত পৰীক্ষাগাৰত ১৮ দিনীয়া সফল অভিযান সম্পূৰ্ণ কৰি ভাৰতলৈ উভতি আহিছে। সফল মহাকাশ অভিযানৰ পিছত পুনর্বাসনৰ বাবে আমেৰিকাত থকা ভাৰতীয় মহাকাশচাৰীজন কাইলৈ ভাৰতত উপস্থিত হ’ব বুলি আশা কৰা হৈছে। সামাজিক মাধ্যমত শুভাংশু শুক্লাই তেওঁৰ মহাকাশ যাত্ৰা আৰু বন্ধুবৰ্গ আৰু পৰিয়ালৰ সৈতে সাক্ষাৎ কৰাৰ উত্তেজনাৰ কথা স্মৰণ কৰি এটা আৱেগিক পোষ্ট শ্বেয়াৰ কৰিছিল।
উল্লেখযোগ্য যে বিশ্বৰ এগৰাকী আগশাৰীৰ মহাকাশচাৰী আৰু ভাৰতীয় বায়ু সেনাৰ বিষয়া শুভাংশু শুক্লা এক্সিঅ’ম-4 অভিযানৰ পাইলট আছিল। এই অভিযানত তেওঁ মহাকাশত বৈজ্ঞানিক গৱেষণা আগবঢ়াই নিয়াৰ লক্ষ্যৰে কেইবাটাও মাইক্র ‘গ্রেভিটি পৰীক্ষা-নিৰীক্ষা কৰিছিল। অহা বছৰৰ শেষৰ ফালে মুকলি হ’বলগা ভাৰতৰ প্ৰথমটো মানৱ মহাকাশ অভিযান গগনযানৰ বাবে বাছনি কৰা মহাকাশচাৰীসকলৰ ভিতৰত শুভাংশু শুক্লা অন্যতম।