● আজি ৰাষ্ট্ৰীয় ক্রীড়া দিৱস। কিংবদন্তি হকী খেলুৱৈ মেজৰ ধ্যানচন্দ্ৰ জন্মবার্ষিকীৰ লগত সংগতি ৰাখি প্ৰতি বছৰে ২৯ আগষ্টত এই দিৱস পালন কৰা হয়। অসমতো আজি দিনজোৰা কাৰ্যসূচীৰে ৰাষ্ট্ৰীয় ক্রীড়া দিৱস আয়োজন কৰা হৈছে। কামৰূপ জিলাত আজিৰ পৰা তিনিদিনীয়াকৈ ৰাষ্ট্ৰীয় ক্রীড়া দিৱস উদযাপন কৰা হ’ব। আজি পুৱা শুৱালকুছিত এটা সমুহীয়া খোজকঢ়া কাৰ্যসূচীৰে অনুষ্ঠানৰ শুভাৰম্ভণি কৰা হয়। এই সামুহিক খোজকঢ়া কাৰ্যসূচীৰ উদ্বোধন কৰে জিলা ক্রীড়া সংস্থাৰ কাৰ্যকৰী সভাপতি ডাঃ কার্তিক মেধিয়ে। শুৱালকুছি বস্ত্ৰ উদ্যানৰ পৰা শুৱালকুছিৰ বালিচৰলৈ উলিওৱা এই সমদলটোত কামৰূপ জিলাৰ প্ৰশাসনিক বিষয়া ৰাজেশ ঠাকুৰে ভাগ লয়। আজি দিনৰ ভাগত পৰম্পৰাগত খেল-ধেমালিৰ লগতে বিভিন্ন কাৰ্যসূচীৰ আয়োজন কৰা হৈছে। ইপিনে, দৰং জিলাতো এইবাৰ তিনিদিনীয়াকৈ ৰাষ্ট্ৰীয় ক্রীড়া দিৱস পালন কৰা হৈছে। আজি পুৱা মঙলদৈস্থিত কলেজিয়েট হাইস্কুল প্ৰাংগণত ক্ৰীড়া দিৱসৰ শুভাৰম্ভ কৰা হয়। শুভাৰম্ভণি অনুষ্ঠানত মঙলদৈৰ বিধায়ক বসন্ত দাস, জিলা আয়ুক্ত পৰাগ কুমাৰ কাকতিৰ লগতে বহু বিশিষ্ট লোক আৰু স্থানীয় ৰাইজ উপস্থিত থাকে।
এই বছৰ ৰাষ্ট্ৰীয় ক্রীড়া দিৱসৰ মূল বিষয়বস্তু হৈছে – শান্তিপূৰ্ণ আৰু সৰ্বাত্মক সমাজৰ প্ৰসাৰৰ বাবে খেল-ধেমালি। এই বিষয়বস্তুৰ জৰিয়তে খেল-ধেমালিয়ে কিদৰে বাধা নেওচি দলীয় ভাৱনা শক্তিশালী কৰে আৰু অঞ্চল-ভাষা অথবা পৃষ্টভূমিৰ মতভেদ দূৰ কৰি জনসাধাৰণক ঐক্যবদ্ধ কৰে সেই বিষয়ে আলোকপাত কৰা হৈছে। ইয়াৰ উপৰি এই বিষয়বস্তুৰ মাধ্যমেৰে শান্তি, সৰ্বাত্মকতা আৰু সদভাৱৰ আহিলা হিচাপে ক্ৰীড়াৰ ব্যৱহাৰত গুৰুত্ব আৰোপ কৰা হৈছে। ৰাষ্ট্ৰীয় ক্রীড়া দিৱসৰ উদযাপনৰ সৈতে সংগতি ৰাখি আজিৰে পৰা ৩১ আগষ্টলৈ তিনিদিনীয়া কাৰ্যসূচীৰে ৰাষ্ট্ৰজোৰা ফিট ইণ্ডিয়া মিছনৰ আয়োজন কৰা হৈছে। ইয়াৰ অধীনত এঘণ্টা খেল-ধেমালিৰ বাবে খেলপথাৰৰ লেখীয়া অভিযানৰ আয়োজন কৰা হৈছে। ইয়াৰ জৰিয়তে জনসাধাৰণক কমেও এঘণ্টা মুকলিত খেলা খেল আৰু শাৰিৰীক গতিবিধিৰ নামত উৎসৰ্গা কৰিবলৈ উৎসাহ দিয়া হৈছে।
