চৰকাৰে মণিপুৰত পুনৰ শান্তি স্থাপনৰ বাবে বিগত এশ দিনত ভালেমান পদক্ষেপ গ্ৰহণ কৰিছে। গৃহ মন্ত্ৰালয়ৰ সূত্ৰই প্ৰকাশ কৰা অনুসৰি ৰাজ্যখনত কেন্দ্ৰীয় সংৰক্ষিত আৰক্ষী বাহিনীৰ দুটা বেটেলিয়ন আৰু কেন্দ্ৰীয় সশস্ত্ৰ আৰক্ষী বাহিনীৰ ২০০টা কোম্পানী নিয়োগ কৰা হৈছে। কেন্দ্ৰীয় গৃহমন্ত্রী অমিত শ্বাহে নিয়মীয়াকৈ ৰাজ্যখনৰ নিৰাপত্তা ব্যৱস্থা পৰ্যালোচনা কৰি থকাৰ লগতে যাৱতীয় ব্যৱস্থাসমূহ সুনিশ্চিত কৰিছে বুলি জানিব পৰা গৈছে। চৰকাৰে লগতে ভাৰত-ম্যানমাৰ সীমান্তত মুক্ত গতিবিধি বন্ধ কৰি দিছে। তদুপৰি নিৰাপত্তা ব্যৱস্থাৰ কেবিনেট সমিতিয়ে ভাৰত আৰু ম্যানমাৰৰ মাজৰ এহেজাৰ ৬১০ কিলোমিটাৰ দৈৰ্ঘ্যৰ আন্তঃৰাষ্ট্ৰীয় সীমান্তত বেৰা আৰু পথ নিৰ্মাণত অনুমোদন জনাইছে।