ডাউনলোড
মোবাইল এপ

android apple
signal

ভাৰতৰ কীৰ্তি আৰু সফলতাই সমগ্ৰ বিশ্বত নতুন দিগন্তৰ সূচনা কৰিছে : প্ৰধানমন্ত্ৰী

ভাৰতৰ কীৰ্তি আৰু সফলতাই সমগ্ৰ বিশ্বতে নতুন দিগন্তৰ সূচনা কৰিছে বুলি প্ৰধানমন্ত্ৰী নৰেন্দ্ৰ মোদীয়ে উল্লেখ কৰিছে। তেওঁ কয়, যে সমগ্ৰ বিশ্বই এই যুগ ভাৰতৰ যুগ বুলি অভিহিত কৰিছে। নতুন দিল্লীত এটা ব্যক্তিগত নিউজ চেনেলে আয়োজন কৰা এটা অনুষ্ঠানত প্রধানমন্ত্ৰীয়ে কয়, যে সম্প্ৰতি ভাৰতে বিশ্বৰ বিকাশক নেতৃত্ব দিছে আৰু বিকাশৰ পথত দ্ৰুত গতিত আগবাঢ়ি গৈছে। তেওঁ কয়, যে ভাৰতে অভিলাষী লক্ষ্যত উপনীত হোৱাৰ বাবে দূৰদৰ্শী পৰিকল্পনা গ্ৰহণ কৰে আৰু ইয়ে ফলপ্ৰসূ ফলাফল প্ৰদান কৰে। তেওঁ লগতে কয়, যে যোৱা দশকত ভাৰত বিশ্বৰ পঞ্চম সর্ববৃহৎ অর্থনীতি হিচাপে পৰিগণিত হৈছে আৰু বৰ্তমান বিশ্বৰ তৃতীয় সর্ববৃহৎ অর্থব্যৱস্থাৰ দিশে দ্রুত গতিত আগবাঢ়ি গৈছে। যোৱা ১০ বছৰত ভাৰত বিশ্বৰ দ্বিতীয় সর্ববৃহৎ তীখা উৎপাদনকাৰী আৰু ম’বাইল ফোন নির্মাতা আৰু তৃতীয় সৰ্ববৃহৎ ষ্টৰ্টআপৰ দেশ হিচাপে পৰিগণিত হৈছে বুলি প্ৰধানমন্ত্ৰীয়ে উল্লেখ কৰে। তেওঁ কয়, যে সৌৰ শক্তি উৎপাদন ক্ষমতা থকা বিশ্বৰ শীৰ্ষ ৫ খন দেশৰ ভিতৰত ভাৰত অন্যতম। প্রধানমন্ত্ৰী নৰেন্দ্ৰ মোদীয়ে উল্লেখ কৰে যে পূৰ্বৰ চৰকাৰে দেশৰ বিকাশত সৃষ্টি কৰা বাধাসমূহ আঁতৰোৱাৰ ক্ষেত্ৰত তেওঁৰ চৰকাৰে অবিৰতভাৱে কাম কৰি গৈছে আৰু মহাকাশ ক্ষেত্ৰখনত ভাৰতক নতুন গতি প্ৰদান কৰিছে। তেওঁ লগতে কয়, যে দেশৰ যুৱ উদ্ভাৱকসকলৰ বাবে মহাকাশ ক্ষেত্ৰখনত নতুন সুযোগৰ সৃষ্টি কৰিছে আৰু ইয়াৰ ফলত দেশত ২৫০ টাতকৈও অধিক মহাকাশ ষ্টার্টআপ আৰম্ভ হৈছে। দেশৰ ৰাষ্ট্ৰীয় সুৰক্ষাত গুৰুত্ব আৰোপ কৰি প্ৰধানমন্ত্ৰীয়ে এই ক্ষেত্ৰত যোৱা দশকটোত গ্ৰহণ কৰা গুৰুত্বপূৰ্ণ কামকাজসমূহৰ ওপৰত আলোকপাত কৰে। প্ৰধানমন্ত্ৰীয়ে প্ৰত্যক্ষ লাভ হস্তান্তৰৰ জৰিয়তে এতিয়ালৈ হিতাধিকাৰীসকলৰ একাউণ্টত ৪২ লাখ কোটি টকা হস্তান্তৰ কৰা হৈছে বুলি উল্লেখ কৰে। তেওঁ কয়, যে ২৫ কোটি লোকক দৰিদ্ৰতা সীমাৰেখাৰ আওতাৰ বাহিৰলৈ অনা হৈছে।