নতুন দিল্লীৰ ৰে’ল ষ্টেচনত যোৱা নিশা হেঁচা ঠেলাৰ ফলত পদপিষ্ট হৈ কেইবাজনো লোক নিহত হোৱা ঘটনাৰ ৰে’ল বিভাগে নিজাববীয়া তদন্ত আৰম্ভ কৰিছে। উত্তৰ ৰে’লৱেৰ মুখ্য জন সম্পৰ্কৰক্ষী বিষয়া হিমাংশু শেখৰ উপাধ্যায়ে এই ঘটনাত শিশু-মহিলাসহ ১৮ গৰাকী লোকৰ মৃত্যু হোৱাৰ লগতে ১৩ গৰাকী লোক আহত হোৱা বুলি প্ৰকাশ কৰিছে। ঘটনা সন্দৰ্ভত তদন্ত অব্যাহত ৰখাৰ বাবে উচ্চ পৰ্য্যায়ৰ সমিতি গঠন কৰা বুলি শ্রীউপাধ্যায়ে সদৰী কৰিছে। ৰে’লৱেৰ মুখ্য বাণিজ্যিক পৰিচালক নৰসিংহ দেও আৰু মুখ্য সুৰক্ষা আয়ুক্ত পংকজ গাংগৱাৰৰ নেতৃত্বত গঠিত তদন্ত কমিটীয়ে ঘটনাটোৰ সকলো ভিডিঅ’ ফুটেজ পৰীক্ষা কৰিব। ঘটনাটোৰ তদন্তৰ দায়িত্ব লৈ দিল্লী আৰক্ষীয়েও ইতিমধ্যে অনুসন্ধান আৰম্ভ কৰিছে। শ্রীউপাধ্যায়ে কয়, যে ভুক্তভোগীসকলৰ বাবে ৰে’ল মন্ত্ৰ্যালয়ে আর্থিক সাহায্য ঘোষণা কৰিছে। এই অনুসৰি, মৃত লোকসকলৰ নিকটাত্মীয়লৈ ১০ লাখ টকা, গুৰুতৰভাৱে আহতসকললৈ আঢ়ৈ লাখ টকা আৰু সামান্যভাৱে আহতসকললৈ ১ লাখ টকাৰ আৰ্থিক সাহায্য আগবঢ়োৱা হ’ব। বিহাৰৰ মুখ্যমন্ত্ৰী নিতীশ কুমাৰেও নিহত সকলৰ পৰিয়াললৈ ২ লাখ টকা আৰু আহত সকললৈ ৫০ হাজাৰ টকাৰ সাহায্যৰ কথা ঘোষণা কৰিছে। আহতসকলক নতুন দিল্লীৰ লোকনাৰায়ণ জয় প্ৰকাশ চিকিৎসালয়ত ভৰ্তি কৰা হৈছে। উল্লেখযোগ্য যে প্ৰয়াগৰাজত চলি থকা মহাকুম্ভ মেলালৈ যোৱাৰ বাবে বহুসংখ্যক যাত্ৰীয়ে যোৱা নিশা দিল্লী ৰে’লৱে ষ্টেচনত ভিৰ কৰাৰ ফলতে এই ঘটনা সংঘটিত হয়। ৰাষ্ট্ৰপতি শ্ৰীমতী দ্রৌপদী মুৰ্মু প্রধানমন্ত্ৰী নৰেন্দ্ৰ মোডীৰ লগতে ৰে’ল মন্ত্ৰী, গৃহ আৰু প্ৰতিৰক্ষা মন্ত্রীয়ে সামাজিক মাধ্যম যোগে এই ঘটনাৰ শোক প্ৰকাশ কৰিছে।