আজি বিশ্ব কৰ্কট দিৱস। কৰ্কট ৰোগ সন্দৰ্ভত জনসাধাৰণৰ মাজত সজাগতা সৃষ্টিৰ লগতে এই ৰোগত আক্ৰান্তসকলৰ সহনশীলতা বৃদ্ধি তথা ৰোগৰ বিৰুদ্ধে যুঁজ দিয়াৰ ক্ষেত্ৰত ৰোগীৰ পৰিয়ালৰ সহযোগিতাৰ প্ৰতি সন্মান জনাই প্ৰতি বছৰে ৪ ফেব্ৰুৱাৰীত এই দিৱস পালন কৰা হয়। এইবছৰৰ বিশ্ব কৰ্কট ৰোগ দিৱসৰ মূল বিষয় হৈছে- United by Unique। এই দিৱস উপলক্ষে আজি ৰাজ্যৰ বিভিন্ন চিকিৎসালয়, প্রাথমিক স্বাস্থ্য কেন্দ্ৰত কেতবোৰ কাৰ্যসূচী গ্ৰহণ কৰা হৈছে। চৰাইদেউ জিলা স্বাস্থ্য সমিতিৰ উদ্যোগত আৰু অসম কৰ্কট পৰিচৰ্যা সংস্থাৰ সহযোগত আজি চৰাইদেউ জিলা চিকিৎসালয়ৰ সভাকক্ষত বিশ্ব কৰ্কট ৰোগ দিৱসৰ কাৰ্যসূচী লোৱা হয়। এই উপলক্ষে আয়োজিত অনুষ্ঠানত সমল ব্যক্তিসকলে এই ৰোগৰ সজাগতা আৰু চিনাক্তকৰণ সন্দৰ্ভত বক্তব্য আগবঢ়ায়। তেজপুৰ কৰ্কট কেন্দ্ৰৰ উদ্যোগত আজি এটা চাইকেল সমদল উলিয়াই সজাগতা সৃষ্টিৰ প্ৰয়াস কৰা হয়। ইয়াৰ পাছতে এখন সজাগতা সভাও অনুষ্ঠিত হয়। দৰং কৰ্কট কেন্দ্ৰৰ উদ্যোগতো আজি দিনজোৰা কাৰ্যসূচীৰে এই দিৱস পালন কৰা হয়। এই উপলক্ষে উলিওৱা সজাগতামূলক পদযাত্ৰাত অংশগ্ৰহণকাৰীসকলে মাদক দ্ৰব্য সেৱন বিৰোধী আৰু কৰ্কট ৰোগ প্ৰতিৰোধী শ্ল’গান দিয়ে। ইয়াৰ পাছতে এখন সজাগতা সভা অনুষ্ঠিত হয়। কোকৰাঝাৰ জিলাৰ ৰূপনাথ ব্ৰহ্ম অসামৰিক চিকিৎ‍সালয়ৰ পৰা চালাকাটিলৈ আজি কৰ্কটৰোগৰ সজাগতামূলক এটা মটৰচাইকেল সমদল উলিওৱা হয়। কোকৰাঝাৰ কৰ্কট চিকিৎসা কেন্দ্ৰৰ অধীক্ষক ডাঃ নির্মল সিঙে এই সমদলৰ শুভাৰম্ভ কৰে। কমেও ৫০ গৰাকী ব্যক্তিয়ে এই মটৰচাইকেল সমদলত অংশ লয়। জিলাখনত কৰ্কট ৰোগ সন্দৰ্ভত ব্যাপক সজাগতা সৃষ্টিৰ উপৰি আক্রান্তসকলৰ মনত এই ৰোগৰ বিৰুদ্ধে যুঁজ দিয়াৰ বাবে সাহস আৰু ইতিবাচক মনোভাৱ সৃষ্টিৰ বাবে এই সমদলৰ আয়োজন কৰা হয়। মৰিগাঁও ধপাত নিয়ন্ত্ৰণৰ কোষৰ উদ্যোগত আজি জিলাখনৰ পবিতৰা হাট ভৱনত কৰ্কট ৰোগৰ বিৰুদ্ধে এখন সজাগতা সভা আয়োজন কৰা হয়। মৰিগাঁও জিলা স্বাস্থ্য বিভাগৰ যুটীয়া সঞ্চালকে উদ্বোধন কৰা এই সভাত মুখ্য অতিথিৰূপে অংশ লৈ ভাৰতীয় কেন্সাৰ কেয়াৰ সংস্থাৰ অধ্যক্ষ তথা জিলাখনৰ আয়ুক্ত দেৱাশীষ শৰ্মাই এই ৰোগৰ সজাগতা সন্দৰ্ভত ব্যাখ্যা আগবঢ়ায়। বৰপেটাৰ কৰ্কট চিকিৎসা কেন্দ্ৰৰ চৌহদৰ পৰা আজি এই ৰোগৰ সজাগতা সমদল উলিওৱা হয়। কৰ্কট কেন্দ্ৰটোৰ চিকিৎসক, নাৰ্ছ আৰু স্বাস্থ্যকৰ্মীৰ দলে এই সমদলত অংশ লয়। সমদলটো মুকলি কৰি বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় আৰু হাস্পতালৰ অধ্যক্ষ ডাঃ ৰমেন তালুকদাৰে এই ৰোগ সন্দৰ্ভত ভ্ৰান্ত ধাৰণাৰ পৰা আঁতৰি থাকিবলৈ আহ্বান জনায়।
মুখ্যমন্ত্রী ড০ হিমন্ত বিশ্ব শৰ্মাই বিশ্ব কৰ্কট ৰোগ দিৱস উপলক্ষে দিয়া এটা বাৰ্তাত কয়, যে এই দিৱস কৰ্কট ৰোগীসকলৰ সৈতে তেওঁলোকৰ পৰিয়ালৰ সহনশীলতা আৰু প্ৰতিকুলতাৰ বিৰুদ্ধে যুঁজ দিয়াৰ মনোভাৱক শ্ৰদ্ধা জনোৱাৰ বাবে পালন কৰা হয়। ৰাজ্যখনত এই ৰোগৰ চিকিৎ‍সাৰ ক্ষেত্ৰত চৰকাৰে প্ৰদান কৰা উৎকৃষ্ট চিকিৎসা সেৱাৰ বিষয়ে মুখ্যমন্ত্ৰীগৰাকীয়ে উল্লেখ কৰে।